Ashyq NQA portalynda Qazaqstanda joǵary bilimdi jáne ǵylymdy damytýdyń 2023-2029 jyldarǵa arnalǵan tujyrymdamasynyń jobasy jarııalandy.
Jobaǵa sáıkes, magıstranttar men doktoranttardy oqytýǵa arnalǵan grant sanyn arttyrý josparlanǵan.
«Ǵylymı kadrlardy (PhD doktorlaryn) daıarlaýǵa memlekettik bilim berý tapsyrysy 5 myń grantqa ulǵaıady. Budan basqa, 2023 jyldan bastap rezıdentýrada daıarlaýǵa arnalǵan granttar sanyn kezeń-kezeńimen 70%-ǵa ulǵaıtý josparlanyp otyr. Joǵary jáne joǵary oqý ornynan keıingi bilim berý uımdary men Ǵylymı-zertteý ınstıtýty ıntegrasııasy sheńberinde ǴZI bazasynda magıstrler men PhD doktorlaryn daıarlaý jalǵasady», delingen tujyrymdama jobasynda.
Eske salaıyq, 2022-2023 oqý jylynda PhD doktorlaryn daıarlaýǵa 1890 grant bólingen.
