TRT Haber telearnasynyń habarlaýynsha, Hataı ortalyǵyndaǵy jer silkinisi bolǵan jerde izdeý-qutqarý jumystary júrgizilip jatyr.
«Bireýi Antakııadan, bireýi Defneden jáne bireýi Samandagtan − úsh azamatymyz qaıtys bolyp, 213 adam aýrýhanaǵa jóneltildi», dedi Ishki ister mınıstri Súleıman Soılý.
Apattar jáne tótenshe jaǵdaılardy basqarý agenttigi (AFAD) teńiz deńgeıiniń 50 santımetrge kóterilý qaýpine baılanysty azamattarǵa jaǵalaý syzyǵynan aýlaq bolýǵa keńes berdi. Sonymen qatar Hataı provınsııasyndaǵy búgingi jer silkinisinen keıin jarııalanǵan teńiz deńgeıiniń kóterilýi týraly eskertýdiń joıylǵanyn habarlady.
Anadolu agenttiginiń habarlaýynsha, Iskenderýn qalasynda úsh qabatty bos ǵımarat opyrylyp qulaǵan.
Túrik áýe joldary bas dırektory Bılal Ekshı Hataı áýejaıynda evakýasııa reısteriniń jalǵasyp jatqanyn habarlady.
Aıta keteıik, keshe Túrkııada jańa jer silkinisi boldy. Magnıtýdasy 6,4 bolatyn birinshi dúmpý jergilikti ýaqyt boıynsha 20:04-te, ekinshisi - 5,8 magnıtýdaly zilzala 20:07-de tirkeldi. Jer silkinisiniń oshaqtary sáıkesinshe Defne jáne Samandag aımaqtarynda boldy. Birinshi jer silkinisiniń oshaǵy − 16,7 km, ekinshisi 7 km tereńdikte ornalasqan.
