«Úsh-aq nárse adamnyń qasıeti»

Oblystyq S.Toraıǵyrov atyndaǵy kitaphanada Qazaq­stan Jazýshylar odaǵynyń múshesi, jýrnalıst, mazhab.kz portalynyń redaktory Amantaı Toıshybaıulynyń «Adam bol» kitabynyń tu­saýy kesildi. Tárbıelik-psıho­logııalyq kitap ǵıbratty áń­gimeler men ómirdiń ózinen alynǵan maǵynaly mysaldardan turady. Qysqa da nusqa áńgimeleri túsine bilgen janǵa oı salatyny haq. Munda álem jaýharlarynyń halqymyzdyń ulttyq mentalıtetine beıimdep aýdarylǵan nusqalary, uly­lardyń sóz marjandary terilip jazylǵan. 

– Eseıe kele sý astyndaǵy ulý qusap tynysh qana ómir súresiń be, álde qyran búrkitteı qııada qalyqtaısyń ba, adam ómi­riniń aldynda eki tańdaý turady. Árıne, adam bolyp qa­lyp­tasýda meıirimdilik, mahabbat, súıispenshilik, keshirim, sabyrlylyq, tózimdilik, taban­dylyq, sanalylyq, para­sat­tylyq qasıetterin sińirý ábden mańyzdy. Eger bul qabiletter pendege jas­taıynan darymasa, elim, jerim degen azamat qaıdan shyqpaq? Ata-babalarymyz at jalyn tartýǵa jarap qalǵan ulandardy osyǵan tárbıelegen. «Adam bolý» degen ne? Ol – óz boıyndaǵy barlyq minez-qulqyń men is-áreketińdi je­ke jaýapkershiligine alý degen sóz. Sabyrsyzdyq pen jal­qaý­lyǵyńdy, tózimsizdigińdi ózge­den kórýge bolmaıtynyn qulaq­qa sińirip ósseń ǵanıbet. Bul kitabym, pedagogter men psı­ho­logterge, ul-qyz asyrap otyr­ǵan ata-analarǵa, mekteptiń joǵa­ry synyp oqýshylary men stý­dentterine neǵurlym paıdaly bolar degen úmittemin, – deıdi avtor.

Amantaı Toıshybaıuly Mon­ǵolııanyń Baıan-О́lgeı aımaǵynda týyp-ósip, táýelsizdikten keıin­gi uly kóshtiń aldyńǵy legin­de atamekenine shalqyǵan qýa­nyshpen jetken azamattyń biri. Ana tilimen qatar, aǵylshyn, nemis, qytaı, orys, monǵol tilde­rin jetik meńgergen. Shetel tilin­degi nebir ǵıbratty dúnıe­lerdi ózimizdiń ulttyq salt-dás­túrge oraılastyra aýdaryp, áleýmettik jelidegi paraq­sha­laryna qısyndy mysaldar, qysqa áńgimelerdi turaqty jarııalap turatyn jazýshy-bloger retinde de tanymal. Osy ýaqytqa deıin toǵyz kitap shyǵa­ryp, rýhanı-adamgershilik tárbıeden bólek, tarıhı zertteýlerge de qalam ozdyrdy. Bul kitaptardyń barlyǵy birin-biri tolyqtyryp otyratyny baı­qa­lady. Eń alǵashqy kitaby otan­shyldyq, atajurt, til taqy­ry­byn­da 1999 jyly jaryq kórgen qalamger búginde jazǵan eńbek­teriniń nátıjesinde fılologııa ǵylymdarynyń kandıdaty atandy.

Shara barysynda «Aqsaqal­dar taǵylymy» uıymy­nyń tór­a­ǵa­sy Ermek Jumatov pen aqyn, respýblıkaǵa tanymal batagóı aqsaqal Baltabaı Syzdyqov kitaptyń tusaýyn kesti.

PAVLODAR