– Kanada men Qazaqstan arasy alys bolǵanymen, kóptegen jaqyndyǵy bar. Mysaly, eki el jer kólemi jaǵynan aýqymdylyǵymen, klımattyq uqsastyǵymen erekshelenedi. Tabıǵı resýrstarǵa – gıdroenergetıka, aýyl sharýashylyǵy áleýetine, paıdaly qazbalarǵa baı. Kanadanyń aýyl sharýashylyǵynda aqparattyq jáne kommýnıkasııalyq tehnologııalar erekshe rólge ıe, – dedi Alan Hamson.
Aqylbek Kúrishbaev Kanadanyń jetekshi joǵary oqý oryndary men kompanııalaryn agronomııa, seleksııa, eginshilik, zooınjenerııa, veterınarııa jáne aýyl sharýashylyǵy salasynda ǵylymı zertteýler júrgizý baǵytynda birlesken bilim berý baǵdarlamalaryn ázirlep, iske asyrýǵa shaqyrdy.
– Bizdiń elderdegi agrobıznes salasy jańa progressıvti tehnologııalardy paıdalana otyryp básekelestik jaǵdaıynda damyp keledi. Osyǵan baılanysty kanadalyq tehnologııalar men noý-haýdy qoldanatyn agroónerkásip kesheni úshin kadrlardy daıarlaýdaǵy yntymaqtastyq áleýetin damytýdy maqsat etip otyrmyz. Bul rette Saskachevana ýnıversıtetimen agronomııa boıynsha birlesken bilim berý baǵdarlamasyn ázirleýdi usynamyz, – dedi A.Kúrishbaev.
Kanadadaǵy Saskachevana ýnıversıteti (UofS) álemdegi bıomedısınalyq ǵylymdar, jaratylystaný ǵylymdary, ınjenerııa jáne tehnologııalar, áleýmettik ǵylymdar jáne menedjment salasyndaǵy úzdikterdiń qataryna kiredi.
Kezdesý aıasynda Qazaq ulttyq agrarlyq zertteý ýnıversıtetiniń basshylyǵy zooınjenerııa, genetıka jáne janýarlar seleksııasy boıynsha bilikti mamandardy daıarlaýǵa basa nazar aýdara otyryp, Kanadanyń jetekshi joǵary oqý oryndarynyń qatysýymen birlesken joba jasaýdy usyndy.
Sonymen qatar Albert ýnıversıtetimen birlesip magıstranttarǵa arnalǵan «О́simdikter týraly ǵylym» birlesken bilim berý baǵdarlamasyn ázirleý, «Bolashaq» baǵdarlamasy boıynsha stýdentterdi taǵylymdamadan ótkizý jáne oqytý, jetekshi professorlar men ǵalymdardy shaqyrý, joǵary oqý oryndary arasynda yntymaqtastyqty damyta otyryp, Qazaq ulttyq agrarlyq zertteý ýnıversıteti bazasynda agrarlyq-ónerkásiptik keshen salasynda Kanadanyń jetekshi ýnıversıtetiniń fılıalyn ashý múmkindikterin qarastyrý qajettigine nazar aýdardy.
Agrarlyq ýnıversıtettiń oqý-óndiristik bazasymen tanysqan Kanada elshiliginiń ókilderi usynystarǵa qyzyǵýshylyq bildirdi.
ALMATY
