Alakóldegi rezıdensııa buǵan deıin oblys ákimi men túrli qonaqtardy qabyldaıtyn qonaqúı bolsa, endi balalardyń demalys nemese saýyqtyrý ortalyǵyna aınalady. Jalpy, atalǵan nysan Aqshı aýylynda ornalasqan. Al balalar ortalyǵy byltyr Úsharal qalasynda ashylǵan edi. Qýanyshty jańalyqty óńir basshysy alakóldiktermen kezdeskende aıtty.
«Búgin «Jansaıa» balalardy ońaltý ortalyǵynyń jumysymen tanystyq. Ashylǵanyna 6 aı bolǵan, qazir oǵan 20-dan astam bala baryp júr. Munda balalarǵa medısınalyq kómek tegin kórsetiledi, túrli korreksııalyq-ońaltý sabaqtary ótkiziledi, balalar sýret salady, demalady, emdik deneshynyqtyrýmen aınalysady. Ata-analar balalaryn esh alańsyz kúni boıy qaldyryp, jumystaryna bara bere alady. Eger balalar shalǵaı aýyldardan kelse, onda jatyn orynmen de qamtylady. Tamaǵy da, basqa da qajettilikteri uıymdastyrylǵan. Budan ári de tıgizer paıdasy eselene tússin degen maqsatta «Jansaıa» ortalyǵyna aýdan ákimdiginiń rezıdensııasyn berýdi usynyp otyrmyn. Aqshı aýylyndaǵy shaǵyn kottedj úıde jazǵy ýaqytta balalar Alakól sýyna shomylyp, densaýlyqtaryn túzeı alady», dedi B.Isabaev.
Odan keıin aýdan ákimdigine jańa demalys maýsymy bastalǵanǵa deıin ǵımaratty jóndeý, ońaltý ortalyǵynyń balansyna ótkizip berý jumystaryna qatysty tıisti sharalar qabyldaýdy tapsyrdy. Oblys ákiminiń baspasóz qyzmetiniń málimetinshe, áleýmettik mańyzy bar nysandy ashýǵa jergilikti bıýdjetten 230 mln teńge bólingen. Bul qarajatqa qaraýsyz qalǵan ǵımaratty retke keltirip, qajetti jabdyqtar men jıhazdar satyp alyndy, irgeles aýmaǵy abattandyryldy, balalar oıyn alańy salyndy. Sonyń nátıjesinde byltyr «Jansaıa» balalardy ońaltý ortalyǵy ashyldy. Ortalyq 50 orynǵa laıyqtalǵan, ázirge onda Alakól aýdanynyń ár túkpirinen 21 bala baryp júr. «Invataksı» qyzmetteri de usynylady.
Ǵajaby sol, munda erekshe qajettilikteri bar balalar oblystan tys jerlerge shyqpaı-aq aqysyz, tegin tolyq emdeý kýrsynan ótedi. Ortalyqta tirek-qımyl apparaty buzylǵan, aýtızm, Daýn sındromy, serebraldy sal aýrýy dıagnozy bar balalardy ońaltý sharalary júrgiziledi. Ońaltýǵa barý úshin VTEK-ten tıisti joldama men jeke ońaltý baǵdarlamasyn alý qajet. Ortalyqta Montessorı kabıneti, fızıoterapııa, emdik deneshynyqtyrý kabınetteri, massaj jáne sensorlyq bólmeler jumys isteıdi, tuz shahtasy bar, psıholog, logoped, defektolog mamandar tıisti medısınalyq qyzmet kórsetedi.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń habarlaýynsha, mundaı ortalyqtar Sarqan, Panfılov jáne Qaratal aýdandarynda jumys isteıdi. Kerbulaq aýdanynda da Balalardy ońaltý ortalyǵyn ashý josparlanǵan.
Jetisý oblysy
