Halyqaralyq baǵdarlamalar ortalyǵynyń málimetinshe, «Bolashaq» baǵdarlamasynyń 30 jyldyq tarıhynda stıpendııadan aıyrylǵan túlek sany shamamen 1 paıyz nemese bar bolǵany 180-ge jýyq adam. Stıpendııadan aıyrylǵandar baǵdarlama sheńberinde jumsalǵan qarajatty tolyǵymen ótedi nemese ótep jatyr.
Vedomstvo ókilderiniń aıtýynsha, elge qaıtpaı qalǵan stýdentterdi aldymen stıpendııasynan aıyrady, keıin olarǵa aıyppul salynady.
Qazaqstan Respýblıkasy Úkimetiniń 2008 jylǵy 11 maýsymdaǵy №573 Qaýlysymen bekitilgen «Bolashaq» halyqaralyq stıpendııasyn taǵaıyndaý úshin úmitkerlerdi irikteý qaǵıdalaryn bekitý jáne stıpendııany jumsaý baǵyttaryn aıqyndaý qaǵıdalarynyń 27-tarmaǵyna sáıkes, konkýrs jeńimpazy ózine «Bolashaq» stıpendııasyn taǵaıyndaý týraly Shetelde kadrlar daıarlaý jónindegi respýblıkalyq komıssııa sheshim shyǵarǵan kúnnen bastap kúntizbelik 90 kún ishinde ákimshimen jumys organy bekitetin úlgilik nysandar boıynsha oqý shartyn nemese taǵylymdamadan ótý týraly shart jasasady, onda mindetti túrde mynalar qamtylýy tıis:
- Konkýrs jeńimpazynyń shetelde akademııalyq oqýyn aıaqtaǵannan nemese taǵylymdamadan ótkennen keıin Qazaqstanǵa mindetti túrde oralýy týraly talap;
- Konkýrs jeńimpazy óz mindettemelerin oryndamaǵan jaǵdaıda jumsaý baǵytynda kózdelgen shyǵystardy qarjylandyrýdy toqtata turý týraly talap.
Qaǵıdalardyń 29-tarmaǵyna sáıkes, konkýrs jeńimpazy shart boıynsha óz mindettemelerin oryndamaǵan ne tıisinshe oryndamasa konkýrs jeńimpazyn «Bolashaq» stıpendııasynan aıyrý týraly máseleni Respýblıkalyq komıssııada qaraý úshin bastama jasalady.
Qaǵıdalardyń 33-tarmaǵyna sáıkes, konkýrs jeńimpazy Respýblıkalyq komıssııanyń sheshimi boıynsha «Bolashaq» stıpendııasynan aıyrylǵan jaǵdaıda Respýblıkalyq komıssııa «Bolashaq» stıpendııasyn taǵaıyndaý týraly sheshim qabyldaǵan kúnnen bastap oǵan jumsalǵan barlyq shyǵyn, oǵan qosa turaqsyzdyq aıyby (aıyppul) ótelýge tıis.
Ortalyqta «Bolashaq» baǵdarlamasy túlekteriniń elde mindettemelerin eńbekpen óteýin baqylaıtyn arnaıy túlektermen jumys basqarmasy bar. Byltyr qatań baqylaý nátıjesinde mindettemelerdi oryndamaǵan stıpendıattardan bıýdjetke 1,6 mıllıard teńgeden asa qarajat qaıtarylǵan.
Aıta keteıik, stıpendııa ıegeri ataný úshin kepilge magıstratýra, doktorantýra jáne rezıdentýra sheńberinde jyljymaıtyn múlik usynylýy tıis. Al taǵylymdamadan ótýshiler 2 jeke tulǵany kepilger retinde kórsete alady. Buǵan qosa, keıingi 12 aıda turaqty tabysy bar, jasy 50-ge tolmaǵan QR azamaty úmitkerge garant bola alady. Jyljymaıtyn múlikti kepilge qoıý talap etilmeıdi.
Sondaı-aq «Bolashaq» baǵdarlamasynyń stıpendıattary kepilge jer qoıa alady.
