Memleket basshysy eldi gazdandyrýdy 60%-ǵa jetkizý jóninde mindet qoıdy. Jalpy «kógildir otynǵa» 11,8 mln-nan astam turǵyny bar 1 800-den astam eldi meken qosylýy tıis.
«Bul tapsyrmany Energetıka mınıstrligi, «QazMunaıGaz» jáne «QazaqGaz» kompanııalary men ákimder tolyq kólemde oryndaýy tıis», dedi Premer-mınıstr.
Oǵan qosa Úkimet basshysy 2019 jyly salynǵan «Saryarqa» magıstraldyq gaz qubyrynyń boıynda tıisti ınfraqurylym tartylyp, qajetti iske qosý keshenderi ornatylǵanyn aıtty. Alaıda Astana qalasy, Qaraǵandy jáne Aqmola oblystarynyń turǵyndaryn kópten kútken gazǵa qosý qarqyny óte tómen deńgeıde qalyp otyr.
«Bul óńirlerdiń turǵyndary gaz taratý jelileri joq, ruqsat qujattaryn alý qıyn jáne gazǵa qosylý qymbat dep shaǵymdanady. Bul osy óńirlerge ǵana emes, sonymen qatar gazben qamtylǵan basqa óńirlerge de qatysty», dedi Álıhan Smaıylov.
Úkimet basshysy mysal retinde Almaty oblysynyń Bıǵash aýylynda turǵyndarǵa gaz ótkizýge 10 jyl boıy ýáde berilip kelgenin aıtty. Túrkistan oblysynyń Tólebı aýdanyndaǵy Alshaly aýylynyń turǵyndary da birneshe jyldan beri kógildir otyn kútip júr.
Premer-mınıstrdiń aıtýynsha, Batys Qazaqstan oblysynyń Zelenoe aýylynda (Oral qalasynan 5 km) gaz 2014 jyly ótkizilgen, biraq osy kúnge deıin ákimshilik ǵımarattar ǵana qosylǵan.
«Aýyldyq eldi mekenderden basqa, qalalarda da halyqty gazben qamtamasyz etýde problemalar bar. Nátıjesin ózderińiz kórip otyrsyzdar, Astana áli de «kók tútinge kómilip», aýanyń lastaný deńgeıi boıynsha álemdik reıtıngterde kósh bastap tur. Almatyda 2 JEO-da jańa bý-gaz qondyrǵysyn salý merzimi keıinge shegerildi. О́ńir ákimderi men «QazaqGaz» kompanııasyna osy máselelerdi erekshe baqylaýǵa alý kerek», dedi Álıhan Smaıylov.
Premer-mınıstr elimizdiń soltústik jáne shyǵys óńirlerin gazdandyrý máselesine núkte qoıatyn ýaqyt jetkenin aıtty. Sondyqtan Energetıka mınıstrligi «Samuryq-Qazyna» qorymen birlesip, 1 mamyrǵa deıin túpkilikti sheshim daıyndaýy qajet.
Álıhan Smaıylovtyń aıtýynsha, gaz ınfraqurylymynyń ábden tozýy da mańyzdy másele.
«Jylý jelileri ábden tozyp-bitken Ekibastuz ben Rýdnyıdaǵy jaǵdaıdy bárińiz kórip otyrsyzdar. Al gaz jelilerine qysym óte joǵary, sondyqtan qaýip te joǵary. Magıstraldyq gaz qubyrlarynyń basym bóligi 30 jyldan astam ýaqyt buryn salynǵan jáne qomaqty qarajatty qajet etedi», dedi Premer-mınıstr.
