Shymkentke attanǵan delegasııa quramyna QR Prezıdenti Is Basqarmasynyń Medısınalyq ortalyǵy aýrýhanasynyń jáne Ortalyq klınıkalyq aýrýhananyń úzdik mamandary, atap aıtqanda neırohırýrgtar, genetıkter, kardıohırýrgtar, arıtmologtar, onkohırýrgtar jáne basqa da dárigerler kirdi.
Eki kún ishinde dárigerler onkologııa, kardıologııa, neırohırýrgııa, gastroenterologııa, arıtmologııa salasynda 157 tegin keńes ótkizdi. Mamandar 16 kúrdeli operasııa, sondaı-aq qazaqstandyq medısınanyń sapasyn arttyrý úshin Shymkent dárigerlerine arnalǵan kóptegen túrli prezentasııalar men master-klasstar ótkizdi. Mundaı is-sharalar óńirlik densaýlyq saqtaý júıesin damytýǵa baǵyttalǵan, oǵan qosa halyq arasynda joǵary tehnologııalyq medısınalyq qyzmetterge qoljetimdilikti arttyrýǵa múmkindik beredi.
Shymkentke barǵan dárigerler komandasynyń quramyna PIB Medısınalyq Ortalyǵy aýrýhanasy dırektorynyń hırýrgııa jónindegi orynbasary, joǵary sanatty neırohırýrg Myńjylqy Berdihodjaev kirdi. Myńjylqy Berdihodjaev otandyq endovaskýlıarlyq neırohırýrgııanyń bastaýynda tur. Ol - Qazaqstanda alǵash ret kúrdeli ota jasaǵan mamandardyń biri. Ol sondaı-aq mı tamyrlarynda anevrızma men arterıovenozdy aqaýlardy endovaskýlıarlyq emdeýdiń jańa ádisterin engizdi. Onyń esebinde mı tamyrlaryna jasalǵan 6500-den astam joǵary tehnologııalyq operasııalar bar.
«Kúnine 13 operasııa jasaǵan kezderim de boldy. Sheteldik semınarlarǵa únemi qatysýǵa tyrysamyn, sheteldik áriptesterimmen tájirıbe almasamyn, birlesken operasııalar júrgizemin», dedi dáriger sapar aıasynda.
Elordalyq neırohırýrg jergilikti turǵyndarǵa barlyǵy 45-ke jýyq tegin keńes berip, birneshe ota jasady.
«Eki naýqasta ıntrakranıaldy arterııalardyń tarylýy boldy, sondyqtan biz ishki uıqy arterııasyna endovaskýlıarlyq stent jasadyq. Úshinshi naýqasta ishki karotıd arterııasynyń jarylǵan anevrızmasy anyqtaldy. Úlken qan ketý boldy. Biz ony qan tamyrlaryna toltyrdyq, ıaǵnı embolızasııa jasadyq. Barlyǵy sátti ótti. Bul joba aımaqtyq dárigerler úshin óte paıdaly bolmaq. Mysaly, keshe biz ıntrakranıaldy stentterdi qoldandyq. Stent - zaqymdalǵan tamyrdyń qabyrǵasyn ustap turýǵa jáne onyń lıýmeniniń dıametrin saqtaýǵa arnalǵan tamyrishilik protez. Onyń kómegimen biz 89 jastaǵy naýqasty emdedik», dedi Myńjylqy Berdihodjaev.
Aıta ketsek, «QR PIB Medısınalyq ortalyǵynyń kúnderi» aıasynda Qazaqstannyń túrli óńirlerinde tájirıbe almasý is-sharalary ótip jatyr. О́zara tájirıbe almasýdyń arqasynda kóptegen medısına qyzmetkerleri biliktiligin arttyryp, kúrdeli otalardy júrgizýge qabiletti dárigerler sany kóbeıip keledi.
