Ábigerge salǵan aqpannyń jańbyry

22-si kúni tańerteńnen qala­ishilik qoǵamdyq kólikter óz ýa­qytynda reıske shyǵa almaı, 2-3 saǵatqa keshikti. Kóshe kóktaıǵaq, keıbir jerlerde sý kólkip jatyr, joldar jabylǵan, mektep oqýshylary alystan oqýǵa aýys­tyryldy. Kúni boıy jaýǵan qysqy jańbyr tek kún besinge taıanǵanda ǵana toqtap, arty qalyń qarǵa ulasty. «Qazgıdromet» sıklonnyń sońynan batystan antısıklon soǵyp, aýanyń temperatýrasy 2-3 kúnnen keıin 25 gradýsqa deıin tómendeıdi degen. Eger búgingi sylpyldaq jappaı qatyp, sýyq soqsa, kóktaıǵaq tipti kók muzǵa aınalýy múmkin.

Aýa raıyn boljaýshylar osy kúni keshke qaraı oblystyń batysy men soltústiginde qatty syrǵyma júretinin habarlady. Aýanyń temperatýrasy qatty tómendemegenimen, jeldiń jyl­dam­dyǵy sekýntyna 23 metr­ge jetetini aıtyldy.

Al 22 aqpan kúni tańǵy 11.00-den bastap barlyq respýb­lıka­lyq mańyzy bar joldar júk mashınalary úshin jabyldy. Sonyń ishinde Astana-Petropavl baǵytyndaǵy trassa Roshınsk selosynan bastap oblys or­talyǵyna deıin, Jezǵazǵan-Pe­tropavl baǵytynyń joly Toq­san bı aýylynan bastap Bes­kólge deıin, Petropavl qala­sy arqyly ótetin Reseıdiń Chelıa­bıns­kisinen Novosıbırskige ba­ra­tyn jolynyń Soltústik Qa­zaq­stan aýmaǵynan ótetin ýchas­kesi jabyldy.

Joldardy jabý týraly habar shyqqanǵa deıin Petropavldan Omby qalasyna shyǵyp ketken KamAZ avtomashınasy tirke­mesimen joldan shyǵyp ketip, Maǵ­jan Jumabaev aýdanynyń aýmaǵynda jambastap qaldy. Qalyń qardyń paıdasy tıip, aýda­rylyp ketýden aman qalǵan sııaqty. Áıteýir júrgizýshisi zaqym alǵan joq.

Oblys polıseıleri qazir qyzý jumys ústinde. Olar jaıaý júrginshiler men kólik aıdaý­shylarǵa habarlamalar jiberip, saq bolýǵa shaqyryp jatyr. Ásirese kólik ıelerine bir-birine jaqyn júrmeýdi, ara­qashyqtyqty uzartýdy, jaıaý júrginshiler ótetin joldarda baıaýlaýdy dybys kúsheıtkishpen eskertip júr. Keshe túske deıin ǵana qalanyń ishinde bes jol-kólik oqıǵasy tirkeldi. Áı­teýir zardap shekkender joq, bir­aq kólikke mehanıkalyq za­qymdar keltirildi. Keshe túnde patrýldik polısııa batalony saqshylarynyń joldardy ba­qy­laý sany arttyrylady dep habar­landy.

Mektep oqýshylary erteń de úılerinen shyqpaı, onlaın rejimde oqıdy. Tosyn ta­bı­ǵattyń qatań minezi qaterge uryn­dyrmasyn dep tilegen táýbe­shil jandar da kóp. Laıym, solardyń tilegi qabyl bolǵaı.

Soltústik Qazaqstan oblysy