Travelscapes – úkimettik mekemeler, birinshi dárejeli qonaqúıler, Týrızm ındýstrııasy, elshilikter jáne korporatıvtik sektorlar arasynda tanymal jergilikti b2b basylymy. Marapattaý rásimine Mádenıet jáne sport mınıstrligi Týrızm ındýstrııasy komıtetiniń tóraǵasy Dastan Ryspekov qatysty.
«Úndistan azamattary úshin 14 kúndik vızasyz rejim engizilgennen keıin Qazaqstanǵa keletin úndistandyq saıahatshylardyń sanynyń aıtarlyqtaı óskeni baıqalady. Sondaı-aq biz mıllıard turǵyny bar el úshin tanymal týrıstik baǵyt retinde tanylǵanymyzdy maqtan tutamyz. Bul jetistik – Qazaqstandaǵy qalalyq, ekologııalyq, qyzyqty oqıǵaly, mádenı jáne MICE týrızm baǵyty retinde ilgeriletýde birlesken kúsh-jigerdiń nátıjesi», dep atap ótti D.Ryspekov.
Aıta keteıik, ótken jyly elimizge 28 300 Úndistan azamaty kelgen. Búgingi tańda Eqonaq aqparattyq júıesiniń derekteri boıynsha, Qazaqstannyń qonaqúılerine Úndistannan kelgen 2 myńnan asa qonaq toqtaǵan. Úndistan azamattary elimizdiń Almaty, Astana jáne Shymkent sııaqty iri qalalarynda demalǵandy jón kóredi eken.
Sondaı-aq Qazaqstan bıyl Delıde uıymdastyrylǵan Ońtústik Azııadaǵy eń iri saıahat jáne týrızm kórmesi SATTE-ge qatysqan edi. Qazaqstan delegasııasy quramynda Mádenıet jáne sport mınıstrligi Týrızm ındýstrııasy komıtetiniń, Kazakh Tourism, tórt otandyq týroperator jáne áýe kompanııalarynyń ókilderi boldy.
