Qasym-Jomart Toqaevqa álemdik ekonomıkanyń ósimine qatysty boljamdardyń, sondaı-aq osy jylǵa arnalǵan makroekonomıkalyq kórsetkishterdiń buǵan deıin maquldanǵan deńgeıde saqtalyp otyrǵany jóninde málimet berildi. Bıylǵy IJО́-niń naqty ósimi 4 paıyz, al munaı baǵasy barreline 85 dollar bolady degen boljam bar.
Premer-mınıstrdiń aıtýynsha, bıýdjet shyǵystaryn ishki qaıta bólý jáne bıýdjet túsimderin arttyrý esebinen 2,2 trıllıon teńgeni naqtylaý josparlanyp otyr. Osy rette shaǵyn jáne monoqalalardy damytýǵa, «Aýyl – el besigi» jobasyn iske asyrýǵa, eldi mekenderdi gazben qamtamasyz etýge, jylýmen qamtý júıelerin salýǵa jáne rekonstrýksııalaýǵa, azyq-túlik qaýipsizdigin saqtaýǵa, sondaı-aq aýyl halqyn jappaı jumyspen qamtý úshin jaǵdaı jasaýǵa qosymsha qarjy bólý kózdelgen.
Kólik ınfraqurylymy men logıstıka salasyn damytý úshin joldar salýǵa jáne rekonstrýksııalaýǵa qarjy bólý, poıyzdardy jańartý, jolaýshylar vagondaryn satyp alý josparlanǵan. Sonymen qatar óńdeý ónerkásibindegi iri jobalarǵa, eldiń qorǵanys qabileti men qaýipsizdigin qamtamasyz etý úshin armııany jańǵyrtýǵa jáne áskerı qyzmet jaǵdaıyn jaqsartýǵa qosymsha qarajat bólý kózdelip otyr.
Prezıdent eldiń damýyna áleýmettik-ekonomıkalyq turǵyda barynsha oń yqpal etý maqsatynda bıýdjet qarajatynyń jumsalýyna baqylaýdy kúsheıtýdiń mańyzdylyǵyn atap ótti.
