Tótenshe jaǵdaılar mınıstri Iýrıı Ilın ońtústik aımaqtarda belsendi qar erý bastalýyna sanaýly kún qalǵanyn aıtty. Sol sebepti qazir barlyq kúsh-jiger aldyn alý sharalary men sý tasqynyna daıyndyqqa baǵyttalǵan.
Jalpy osy jyldyń eki aıynda 15 shaqyrym ýaqytsha bógen salyndy, 24 shaqyrymǵa jýyǵy jóndeldi, 16 shaqyrymnan astam jańa bógen, sondaı-aq eldi mekenderdiń aınalasynda 41 shaqyrym bilik turǵyzyldy. Odan bólek 5 myń shaqyrymǵa jýyq kanaldar men aryqtar, avtomobıl joldary jáne temirjoldar astynda 8,5 myńnan astam sý ótkizý qurylysy tazartyldy.
Sý tasqyny jaǵdaıynyń qolaısyz damýy kezinde sý basý aımaǵynda 255 eldi meken bolýy múmkin. Oǵan qosa sý tasqyny tótenshe jaǵdaılarynyń yqtımal jaǵymsyz saldarynyń aldyn alý jáne olardy azaıtý maqsatynda Azamattyq qorǵaýdyń memlekettik júıesiniń oblystyq kishi júıeleriniń bólimsheleri joǵary daıyndyq rejımine aýystyryldy.
Ekologııa jáne tabıǵı resýrstar mınıstri Zúlfııa Súleımenova kóktemge arnalǵan jańartylǵan derekter týraly, Indýstrııa jáne ınfraqurylymdyq damý mınıstri Marat Qarabaev joldardy, kópirlerdi jáne sý ótkizý qurylystaryn sýdyń kóterilýine daıyndaý týraly habardar etti.
Túrkistan oblysynyń ákimi Darhan Satybaldy, Jambyl oblysynyń ákimi Nurjan Nurjigitov jáne Batys Qazaqstan oblysynyń ákimi Narıman Tóreǵalıev óńirlerdegi qazirgi ahýal men sý tasqyny kezeńine daıyndyq týraly baıandady.
Baıandamashylardyń sózin tyńdaı otyryp, Premer-mınıstr bıyl qardyń kóp bolýyna jáne jer betiniń qatyp qalýyna baılanysty sý tasý qaýpi joǵary ekenin aıtty.
Úkimet basshysynyń aıtýynsha, bıyl elimizdiń ońtústik óńirlerinde kúrdeli jaǵdaı qalyptasýyna sý burý arnalarynyń, aryqtardyń, qorǵanysh jer úıindileriniń bolmaýy sebep bolǵan. Saldarynan Túrkistan, Jambyl jáne Almaty oblystaryndaǵy drenajdyq júıelerdiń jaýyn-shashynnyń kóp mólsherine qýaty jetpedi. Odan bólek Atyraýda qar kúrt erip, kóshelerdi sý basyp qaldy.
Odan bólek, Premer-mınıstrdiń aıtýynsha, kommýnaldyq, jeke menshik jáne ıesi joq gıdrotehnıkalyq qurylystardy jóndeý jónindegi sharalar ázirlep, sý qoımalaryn toltyrý kólemin qaıta qaraý kerek jáne qajet bolsa, olardy aldyn ala qaýipsiz bosatý jóninde sharalar qabyldaný kerek.
«Qazirgi tańda bul másele boıynsha respýblıkalyq deńgeıde Premer-mınıstrdiń birinshi orynbasary jetekshilik etetin úkimettik komıssııa jumys istep jatyr. Komıssııa jaǵdaıdy baqylaýda ustap, sý tasý jaǵdaılarynda jedel áreket etýge daıyn bolýy tıis», dep túıindedi Álıhan Smaıylov.
