Balabaqsha qurylysyna daıyndyq jumystary 2022 jyly júrgizildi. «ArselorMıttal Temirtaý» kompanııasy jobany ázirleýge asa muqııat qarady.
- Bizdiń basty maqsatymyz – balalar qýana baratyn jaıly balabaqsha salý. Balabaqsha barlyq talapqa saı keletin zamanaýı bolady. Memlekettik saraptama júrgizilip boldy, atqaratyn jumys kólemi úlken, - dedi «ArselorMıttal Temirtaý» AQ korporatıvtik áleýmettik jaýapkershilik jónindegi dırektorynyń mindetin atqarýshy Gúlnara Stamqulova.
Qala bıligi naq osy aýdanda balabaqsha óte qajet dep sanaıdy.
- Áleýmettik mindettemeler aıasynda bizdiń qala quraýshy kásipornymyz – «ArselorMıttal Temirtaý» AQ 285 oryndyq jańa zamanaýı balabaqsha salýǵa bastamashy boldy. Joba shynymen de biregeı, ol qaladaǵy 2 jastan 6 jasqa deıingi balalardyń 80 paıyzyna deıin qamtýǵa múmkindik beredi. О́ıtkeni Temirtaýda qazir 1,5 myńnan astam bala kezekte tur. Bul jobany iske asyrý bizge aıtarlyqtaı qoldaý bolady. Bolashaq balabaqshanyń janynda jaqyn arada 270 páterlik áleýmettik úılerdi salý jobasy iske asyrylmaqshy, al qalanyń osy bóliginde balabaqsha múldem joq. Osy jobany iske asyra otyryp, Prezıdentimizdiń saıasatyn qoldaǵany úshin qala quraýshy kásipornymyzǵa rızashylyǵymyzdy bildiremiz, - dedi Temirtaý qalasy ákiminiń áleýmettik máseleler jónindegi orynbasary Samat Zııashev.
Kompanııa joba qunyn ázirge jarııalaǵan joq. Sebebi merdiger uıym áli anyqtalmaǵan. Kompanııa tartý etetin jańa balabaqsha Temirtaýdaǵy 4a mekenjaıynda boı kóteredi. Onyń qurylysy osy jyldyń sáýir aıynda bastalady.
- Jańa balabaqsha 2024 jyly jumys isteı bastaýy úshin biz jobany bir jyl ishinde aıaqtaýdy josparlap otyrmyz. Quramynda jobalaý-konstrýktorlyq bólim, qarjy jáne jabdyqtaý qyzmetteri, kúrdeli qurylys basqarmasy, qaýipsizdik tehnıkasy qyzmeti, joǵary býyn basshylary bar bizdiń myqty komandamyz kózdegen maqsatqa jetetinine senimdimin, - dedi Gúlnara Stamqulova.
Balabaqsha qurylysy aıaqtalǵannan keıin ol qalanyń balansyna beriledi.
