Aqyndy oblys ákimi Aıdarbek Saparovtyń atynan Ishki saıasat basqarmasynyń basshysy Kemel Ospanov quttyqtap, óńir basshysy quttyqtaýyn jetkizdi. «Biz sizdi búgingi qazaq poezııasy alyptarynyń qatarynda jaqsy bilemiz. Sizdiń óleńderińiz poezııany ejelgi qazaq óleńiniń sarynynan ajyratpaı, ony jańa túrmen qulpyrtyp, búgingi zamandastarymyzdyń júregine qondyra bildi. Sonymen qatar siz áleýmettik salmaǵy aýyr óleńder de týdyryp, oıly oqyrmannyń sanasyna qazynaly júk tastap kelesiz. Jazyqsyzdan lagerge qamalǵan áıel-analar týraly jazylǵan «Qara oramal» atty poemańyz qazir álemniń 16 tiline aýdarylyp, dúnıe júzin sharlap ketti. Keńestik qandy qasaptyń zardabyn tanytýda mundaı shyǵarmalarǵa baǵa jetpeıdi. Sizdiń «Janymnyń japyraqtary», «Júregimniń juldyzy», «Qusqanaty», «Ardakúreń», «Aq sısa», «Tamakóshken», «Esil aǵady», «Aı synyǵy», «Aı tańbaly arǵymaq», t.b. jyr jınaqtaryńyz Qyzyljar óńiri turǵyndaryna jaqsy tanys», delingen quttyqtaýda. Sonymen birge ákim Ǵalekeńniń soltústikte qazaq óneri men ádebıetiniń órkendeýine ólsheýsiz úles qosyp kele jatqany da aıtylypty. «Oblysymyzda aıtys, músháıra nemese ataqty adamdarymyzdyń mereıtoılary bolsa siz elimizge belgili almatylyq, astanalyq jyr súleılerin, ataqty aqyn-jazýshylardy alyp kelip, bizdiń óńirdiń mádenı is-sharasyna zor salmaq beresiz», depti ákim óziniń quttyqtaýynda.
«Aı tańbaly arǵymaq» atty ádebı keshte aqyn óziniń óleńderin oqydy, soltústiktiń ádebıetsúıer qaýymy atynan professor Zarqyn Taıshybaı, Jarasbaı Súleımenov, osy keshke Kókshetaýdan arnaıy kelgen jazýshy Jabal Erǵalıev taǵy basqalar sóılep, aqyndy quttyqtady.
О́ńirimizge belgili mesenat, kásipker Jomart Omarov aqynǵa shapan jaýyp, astyna at mingizdi.
PETROPAVL
