Ulttyq banktiń túsindirýinshe, teńge kýrsynyń kúsheıýi «salyq kezeńi» faktorymen jáne sheteldik ınvestorlardyń Qazaqstan Respýblıkasynyń memlekettik baǵaly qaǵazdarǵa kirýimen de baılanysty boldy. Kvazımemlekettik sektor sýbektileriniń valıýtalyq túsimin satýy ótken aıda shamamen 295 mln dollar bolypty. Aıta keteıik, kvazımemlekettik sektor kompanııalary ekinshi deńgeıli bankter arqyly valıýta naryǵynda satýdy derbes júzege asyrady.
«Ulttyq qordan respýblıkalyq bıýdjetke transfertterdi qamtamasyz etý úshin valıýta satý aqpanda 590 mln dollardy qurady. Ulttyq qordan satý úlesi saýda-sattyqtyń jalpy kóleminen 23%-dy qurady jáne bir kúnde 30 mln dollardan aspady. Ulttyq qordyń qarajatymen operasııalar júrgizý kezinde Ulttyq bank naryqtyń beıtarap qaǵıdatyn saqtaıdy. Bul shetel valıýtasyn turaqty jáne birkelki satý degendi bildiredi. Osy tájirıbe valıýta naryǵyna Ulttyq qor operasııalarynyń áserin barynsha azaıtýǵa múmkindik beredi», delingen habarlamada.
BJZQ zeınetaqy aktıvteriniń valıýtalyq úlesin 30% deńgeıinde ustap turý maqsatynda Ulttyq bank aqpanda bırjalyq saýda-sattyqta shetel valıýtasyn satyp alýdy júzege asyrǵan. Onyń jalpy somasy 226 mln dollaryna shyqty nemese naryqtyń jalpy kóleminen shamamen 9% boldy.
BJZQ zeınetaqy aktıvteriniń valıýtalyq úlesin qoldaý úshin naýryzda 200-den 240 mln dollarǵa deıingi mólsherde valıýta satyp alynady dep kútiledi. Ulttyq Bank transparenttilik qaǵıdaty aıasynda valıýta naryǵynda júrgiziletin barlyq operasııa týraly tolyq aqparatty jarııa etýin jalǵastyra bermek.
Naýryzda Ulttyq qordan naqty satý kólemi Qarjy mınıstrliginiń respýblıkalyq bıýdjetke transfertterdi bólýge arnalǵan ótinimine baılanysty bolmaq. Qarjy mınıstrliginiń qajetti transfertterdiń somasy boıynsha aǵymdaǵy boljamdy baǵdarlary negizinde aldyn ala Ulttyq bank teńge túsimderine qaraı 750-den 850 mln dollarǵa deıin mólsherde valıýta satýdy josparlap otyr.
«Qysqamerzimdi perspektıvada teńge dınamıkasy geosaıası jaǵdaıdyń ózgerýine, ishki qatysýshylardyń kútýlerine jáne álemdik naryqtardaǵy jaǵdaıǵa baılanysty bolady. Ulttyq bank teńgerimsizdik jınaqtalýyna jol bermeıtin jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejimin ustanýdy jalǵastyrady», delinedi aqparattyq habarlamada.
Aıta keteıik, aqpanda Ulttyq bank valıýtalyq ıntervensııalar júrgizbegen.
