Densaýlyq saqtaý mınıstrligi Slovakııa Respýblıkasy Densaýlyq saqtaý mınıstrligimen «Komırnatı/Omıkron» (Pfaızer) vaksınasynyń 500 myńnan astam dozasyn óteýsiz negizde jetkizý týraly ýaǵdalastyqqa qol jetkizdi.
Densaýlyq saqtaý mınıstrligi baspasóz qyzmetiniń habarlaýynsha, vaksına búgin túnde Qazaqstanǵa keldi.
О́ndirýshiniń nusqaýlaryna sáıkes, «Komırnatı/Omıkron» vaksınasy buryn koronavırýsqa qarsy vaksınasııalaýdyń bastapqy tolyq kýrsyn alǵan 12 jastan asqan adamdardy revaksınasııalaý úshin ǵana usynylady.
«Komırnatı/Omıkron» vaksınasy - bul koronavırýs shtamynyń jańa nusqalaryn eskere otyryp jańartylǵan jáne quramynda Omicron BA 4 jáne BA.5 sýbvarıanttary bar vaksına. Elge kelgennen keıin «Komırnatı/Omıkron» vaksınasy óńirler boıynsha taratylady jáne koronavırýs ınfeksııasyna qarsy revaksınasııalaý úshin qoljetimdi bolady.
Qazirgi ýaqytta Qazaqstan aýmaǵynda vaksınasııanyń tolyq kýrsyn alý, sonymen birge halyqty revaksınasııalaý úshin «KazVak» (QR), «Sınofarm» (Qytaı), «Komırnatı» (Pfaızer, AQSh) vaksınalary bar.
