Sport • 05 Naýryz, 2023

Balalar alamany aıaqtaldy

170 ret

kórsetildi

3 mın

oqý úshin

Reseı Federasııasynyń Kýzbass aımaǵynda uıymdastyrylǵan qysqy sport túrlerinen II «Azııa balalary» oıyndary óz máresine jetti. Jarystyń resmı jabylý rásiminde elimizdiń kók baıraǵyn short-trek sportynyń sheberi Madııar Madıhov ustap shyqty. Al halyqaralyq oıyndardyń týyn túsirý rásimine chempıon retinde Qazaqstan atynan Meıirjan Tólegen qatysty.

Álı BITО́RE

On kúnge jalǵasqan keshendi jarysta Qazaqstan quramasynyń sportshylary 3 altyn, 5 kúmis jáne 6 qola medalǵa qol jetkizip, jalpykomandalyq esepte 6-orynǵa taban tiredi. Jalpy, Kýzbastaǵy oıyndarǵa sporttyń bes túrinen 58 otandasymyz attanǵan edi. Olar short-trek, konkımen júgirý, kıorlıng, shańǵy jarysy, shaıbaly hokkeı, shańǵymen tuǵyrdan sekirý sport túrlerinen synǵa tústi.

Kýzbastaǵy II «Azııa balalary» oıyndarynda Qazaqstan quramasynyń qorjynyna altyn júldeni Ilıa Mızernyh (shańǵymen tuǵyrdan sekirý, K-40), Meıirjan Tólegen (short-trek), Varvara Glýhova (konkımen júgirý) salǵan bolsa, Meıirjan Tólegen (short-trek, 1500 m), Ilıa Shılnıkov (shańǵymen tuǵyrdan sekirý, K-40), estafetada erler quramasy (short-trek), aralas komandalyq synda Ilıa Mızernyh pen Sofıa Shıshkına (shańǵymen tuǵyrdan sekirý), sprıntte erler quramasy (konkımen júgirý) kúmis júldeger atandy.

Al Malıka Joltabar (short-trek, 1500m), Sofıa Shıshkına (shańǵymen tuǵyrdan sekirý, K-40), estafetada qyzdar quramasy (short-trek), aralas komandalyq synda Ilıa Shılnıkov pen Alıona Sverıdenko (shańǵymen tuǵyrdan sekirý), Madııar Madıhov (short-trek, 100 m), shańǵy jarysyndaǵy dostyq estafetasynda Arına Andrıýshenko («Sport» quramasynda) qola júldege ıe boldy.

Jalpykomandalyq esepte Sibir federaldy okrýgi medal jıyntyǵy boıynsha bas júldeni oljalasa, odan keıingi oryndarǵa Máskeý oblysy, Oral men Qıyr Shyǵys federaldy okrýginiń quramalary jaıǵasty. Jas sportshylar bıylǵy saıysta 57 medal jıyntyǵyn sarapqa saldy.

2023 jylǵy Azııa balalarynyń básekesine Qazaqstan quramasynan bólek, Armenııa, Aýǵanstan, Belarýs, Kýveıt, Qyrǵyzstan, Lıvan, Nepal, Tájikstan, Taıland, Túrikmenstan, О́zbekstan memleketiniń sportshylary qatysty. Sondaı-aq Máskeý oblysy, Kýzbass aımaǵynyń quramasy, Qıyr Shyǵys federaldy okrýgi, Sibir federaldy okrýgi, Oral federaldy okrýginiń quramasy, Bashqurtstan, Saha jáne Tatarstan respýblıkalarynyń ókilderi de baıraqty dodada óner kórsetti. Al Taıland, Lıvan men Aýǵanstan quramalary bıyl alǵash ret «Azııa balalary» oıyndaryna qatysqanyn aıta ketken jón.

Qazaqstan 2019 jyly ótken alǵashqy «Azııa balalary» oıyndaryna 8 sporttan 74 sportshy aparyp, jalpykomandalyq esepte 7 altyn, 7 kúmis jáne 6 qola medalmen 11 quramanyń ishinde 6-orynnan kóringen edi.