Baspasóz hatshysy qandaı bolýy kerek?

Semınarǵa ortalyq jáne óńirlik memlekettik organdardyń birqatar baspasóz hatshylary qatysty. Is-shara sońynda uıym­­dastyrýshylar semınar qaty­sý­shy­laryna belsendiligi úshin alǵys aıtyp, sertıfıkat tabystady. Semınardyń ekinshi kúni koých, PR jáne krızıs-menedjer Asqar О́tepqalıevtyń emosıonaldy ıntellekt boıyn­sha sarapshy Ásel Muratovanyń, medıatrener, redaktor Nazgúl Qojabektiń jáne «Astana» halyqaralyq qarjy ortalyǵynyń kommýnıkasııa boıynsha basqarýshy dırektory Elena Paktyń sheberlik saǵattarymen jalǵasqan bolatyn. Olar ne aıtty?

– Baspasóz hatshysynyń mekemeni daǵdarys jaǵdaıyna ákelýi múmkin degen jazbalar men jarııalanymdardy qadaǵalap otyrýy mańyzdy. Sheshimge yqpal etý nemese ózgertý múmkindigi bolmasa der kezinde basshylyqpen keńesý qajet. PR qyzmeti uıymnyń brendi men bedelin nyǵaıtýǵa, poz­ısııany anyqtaýǵa, negizgi habarlamalar­dy taratýǵa jáne daǵdarys kezindegi táýekelderdi basqarýǵa jaýap beredi, – dedi E.Pak.

Al barlyq deńgeıdegi baspasóz hatshylarynyń aldynda sheberlik synybyn ótkizgen kásibı spıchraıter Dana Saýdegerova memlekettik organ ókili men jýrnalıster arasyndaǵy qarym-qatynastyń ózektiligine toqtaldy.

– О́z aýdıtorııasyn bilý, durys kommýnıkasııa ornatyp, senim uıalatý – bas­ty ereje. Árbir maqsatty aýdıtorııa júzdegen sıpatqa ıe bolýy múmkin. Sondyqtan kompanııalar kimderge ónim usynatynyn jáne qajetti aqparatty qalaı jetkizý kerektigin túsiný úshin óz aýdıtorııasyn muqııat zertteıdi, – dedi D.Saýdegerova.

Sondaı-aq Syrtqy ister mınıstr­liginiń eks-resmı ókili Janbolat Úsenov kommý­nıka­sııadaǵy daǵdarys jaǵdaıy ke­zindegi baspasóz hatshylarynyń róline toqtaldy.

– Áýelgi talap – operatıvti bolý. Aýdıtorııa árqashan jaǵ­daıdyń túsin­dirilýin kútedi. О́zara qarym-qatynastyń bolmaýy sizdiń oqıǵańyzdy basqalardyń basqaryp ketýine áser etedi. Iаǵnı eger siz túsinikteme bermeseńiz, ony basqa bireý jasaıdy. Aq­paratyńyz, aıtar oıyńyz, múmkindiginshe, qarapaıym jáne qysqa bolýy kerek. Konteksti tú­­siný, baılanystardy uǵyný jáne olardy is júzinde qoldaný – bas­pasóz hatshysy jumysynyń mańyzdy aspektileri, – dedi J.Úsenov.

Sondaı-aq «TANBA» PR agent­tiginiń basshysy, «PRshy» klýbynyń múshesi Aqsulý Sanǵalı trenıngte memlekettik organdar men jeke kompanııalarǵa PR jasaýdyń qyr-syrymen bólisti. Buǵan qosa press-relız jazý týraly keńinen tarqatty.

– Press-relız jazýdyń 7-8 tehnologııasy bar. Eń ońaıy – «11 jas prın­sıpi». Bul 11 jastaǵy balalar sizdiń jazǵanyńyzdy túsinýi kerektigin bildiredi. Press-relız aýdıtorııasy – tek jýrnalıst emes, jýrnalıst ony halyqqa taratady. Ol – bir. Ekinshi – press-relızińizde, materıaldaryńyzda aýdıal, vızýal, estetıkalyq kon­tentti paıdalansańyz, sizdiń mátinińiz áldeqaıda ótimdirek bolady, – dep atap ótti ol.

Aıtpaqshy, eki kúndik semınardan bilim-biligin shyńda­ǵandardyń biri – Danııar Asqaruly. Medıa maman qazir Jambyl oblysy ákiminiń baspasóz hatshysy. Ári osy qurylymnyń jetekshisi.

– Áleýmettik sıpat alǵan ár túıindi zerdelep, zerttep, qa­lyń kópshilikke usynýda jýrna­lıster men jaýapty mekeme ókilderiniń arasyndaǵy baılanys turaqtylyǵy eskerilýi shart. Osy oraıda eki ta­raptyń kásibıligi nazardan tys qalmaq emes. Sondyqtan bizge de osyndaı trenıng, semınar, sheberlik saǵattary kerek-aq. Semınarda baspasóz qyzmeti stra­te­gııalyq agent­tikke qaraı boı túzeý kerek ekendigi aıtylyp ótti. Ras. Bul turǵyda bizde shetelden ala­­tyn da tájirıbeler óte kóp. Bul semı­nardyń ózinen biraz aq­parattardy bildik. Aqparat jáne qoǵamdyq damý mınıstrligi, Prezıdenttiń baspasóz qyz­meti, Qazaqstandyq qoǵamdyq damý ınstıtýty men «MediaLab» orta­lyǵy uıymdastyrǵan ıgi isi jal­ǵasyn tabady degen senimdemin, – dedi D.Asqaruly.