Astanada qaýipsizdik tehnıkasy men eńbekti qorǵaýdyń buzylýyna baılanysty 2 qurylys nysanynda («Raıymbek» jáne «Ayana Plaza» kóppáterli turǵyn úı kesheni) qurylys-montaj jumysy toqtatyldy. «Raıymbek» kóppáterli turǵyn úı kesheni boıynsha anyqtalǵan buzýshylyqtar joıyldy. Al «Ayana Plaza» kóppáterli turǵyn úı kesheni boıynsha materıaldar sotqa berildi. Sondaı-aq ótken jyldyń ózinde memlekettik eńbek ınspektorlary eńbek zańnamasyn buzǵany úshin 87 jumys berýshini ákimshilik jaýapkershilikke tartty. Aıyppul somasy 16 mln 700 myń teńgeden asty.
Qurylystaǵy óndiristik jaraqattanýdyń negizgi sebebi nysandarda jumys óndirisiniń joǵary qarqyny jáne qurylys salýshylar tarapynan eńbektiń qorǵalýy men qaýipsizdik tehnıkasyna qajet qarajattyń jetkiliksiz bólinýi bolyp sanalady. Kóp jaǵdaıda shaǵyn merdigerlik uıymdarda qyzmetkerlerdi jazataıym oqıǵalardan mindetti saqtandyrý sharttary joq.
Qoldanystaǵy zańnamaǵa sáıkes barlyq qyzmetkerler jeke qorǵanys quraldarymen (qorǵanys bas kıimi, arnaıy kıim, montajdaý beldigi), sondaı-aq ujymdyq qorǵaý quraldarymen qamtamasyz etilýi tıis. Sonymen qatar, bıik oryndardaǵy jumys oryndarynda jáne olarǵa ótetin joldarda qorǵanys qorshaýlary bolýy kerek jáne zattardyń bıikten qulap ketpeýi úshin qorǵanys torlary bolýy kerek.
Qurylys nysandarynda eńbek qaýipsizdigi jáne eńbekti qorǵaý talaptary saqtalmaǵan jaǵdaıda jumystyń barlyq túri toqtatylady, sondaı-aq ákimshilik jáne qylmystyq jaýapkershilik sharalary qoldanylatyn bolady. Memlekettik eńbek ınspektorlary kásiporyndardyń eńbek ujymdarymen eńbek qaýipsizdigi jáne eńbekti qorǵaý jónindegi talaptardy saqtaý boıynsha túsindirý jumysyn júrgizedi, uıym basshylyǵyna óndiristegi jazataıym oqıǵalardan saqtandyrý sharttaryn jasasý jónindegi mindetter túsindiriledi.
