Agenttiktiń jazýynsha, zilzalanyń aýqymdy zardabyna baılanysty tergeý sharalary jalǵasyp jatyr. Osy ýaqyt aralyǵynda Túrkııanyń Bas prokýratýrasy adam ólimine ákep soqtyrǵan sapasyz qurylysqa 1068 tulǵanyń qatysy baryn anyqtaǵan.
320 kúdikti elden ketpeý týraly kepilmen bosatylǵan. Sondaı-aq 228 kúdiktini ustaýǵa buıryq berilse, 106 kúdiktini qamaýǵa alýǵa order berilgen.
Sonymen qatar kúdiktilerdiń 43-i ómirden ótkeni, al 14 adam shetelde ekeni belgili bolǵan. Buǵan deıin Bas prokýratýra eldiń 11 provınsııasynda qurylys jumystaryn durys júrgizbedi degen kúdikpen 564 adamdy anyqtaǵan bolatyn.
Al 26 aqpanda jer silkinisinen keıin búlinbegen birde-bir ǵımarat qalmaǵan Gazıantep provınsııasyndaǵy Nýrdagy qalasynyń meri ustalǵan edi.
Eske salsaq, 6 aqpan kúni Túrkııanyń ońtústik-shyǵysynda magnıtýdasy 7 baldan asatyn eki joıqyn jer silkinisi boldy. Tabıǵı apat kórshiles Sırııaǵa da áser etip, onda da turǵyn úıler qırap, adamdar úıindi astynda qaldy.
Sońǵy málimetter boıynsha Túrkııada zilzala saldarynan qaza tapqandar sany 46 myńnan asqan.
