Marapat • 12 Naýryz, 2023

Joldasbekov júldegerleri

313 ret

kórsetildi

1 mın

oqý úshin

Ál-Farabı atyndaǵy Qazaq ulttyq ýnıversıtetinde ótken О́.Joldasbekov atyndaǵy matematıka jáne mehanıka boıynsha XII halyqaralyq ǵylymı jobalar baıqaýynda Almaty qalasynyń qurama komandasy jeńiske jetti. Tájikstan, Qyrǵyzstan jáne Qazaqstannan 150-den astam oqýshy qatysqan baıqaýda almatylyq komanda 4 altyn, 2 kúmis jáne 4 qola medal ıelendi.

Elvıra SERIKQYZY

– Mektep oqýshylarynyń jeńisine árdaıym qýanamyz. Búgin olar taǵy da júldeli oryndarǵa ıe boldy. Olardy jeńisimen quttyqtaımyz! Bilim alýǵa degen ynta eshqashan sónbesin. Halyqaralyq baıqaý jyl saıyn ǵylymı-zertteýge qyzyǵýshylyq tanytqan daryndy oqýshylardy anyqtaý úshin ótkiziledi. Osylaısha, naqty ǵylymdy zertteýge yntalandyramyz, – dep atap ótti Almaty qalalyq bilim basqarmasynyń basshysy Lázzat Jylqybaeva.

Baıqaýǵa qatysýshylar matematıka, qoldanbaly matematıka, mehanıka jáne ekonomıkadaǵy matematıkalyq ádister boıynsha ǵylymı jobalaryn qorǵady.

Qatysýshylar arasynan №159 gımnazııanyń oqýshylary Abaı Baǵjan men Jóken Dııar, sonymen qatar №178 mamandandyrylǵan lıseıdiń oqýshylary Muqash Ermuhan men Áýbákir Ińkár jeńimpaz atandy. №178 mamandandyrylǵan lıseı oqýshylary Jalǵasbek Adal jáne Aıajan Maratova kúmis júldege ıe boldy. №159 gımnazııanyń oqýshylary Erasyl Esengeldın, Nuraly Oralbekov, Janbota Dáýlenhan jáne №39 mamandandyrylǵan lıseıdiń oqýshysy Oljas Maısyuly úshinshi oryndy enshilese, baıqaýǵa qatysqany úshin №83 gımnazııanyń oqýshysy Aıaýlym Shaıahmet arnaıy gramotaǵa ıe boldy.

ALMATY