Týrnırdiń maqsaty - qazaq jýrnalıstıkasynyń damýyna zor úles qosqan Nurtileý Imanǵalıuly, Amangeldi Seıithan jáne Beısen Quranbekti eske alý jáne eńbekterin dáripteý.
Is-sharaǵa Nurtileý Imanǵalıulynyń jubaıy Qarlyǵash Sovetbekqyzy, Beısen Quranbektiń jary Gúlmıra Zerbaı jáne Amangeldi Seıithannyń uly Begasyl Seıithanov qatysty.
Týrnırdiń ashylý saltanatynda sóz alǵan Marat Nábıev is-sharanyń mańyzdylyǵyna toqtalyp ótti.
«Jýrnalıstıka salasynyń múıizi qaraǵaıdaı alyptaryn eske alýǵa arnalǵan búgingi dodada barshańyzdy kórgenimizge qýanyshtymyz. Dara tulǵalardyń esimderin ulyqtaý – siz ben bizdiń azamattyq boryshymyz. Meniń ákem Ásken Nábıev jýrnalıst bolǵan. Sondyqtan maǵan jýrnalıstıkamen, aqparatpen aınalystyn adamdar óte jaqyn. Ákemniń 100 jyldyq mereıtoıymen tuspa-tus kelgen osy sharanyń men úshin mańyzy erekshe», dedi M.Nábıev.
Shara barysynda jarty ǵasyrǵa jýyq ǵumyryn qazaq jýrnalıstıkasy men televızııasyna arnaǵan Nurtileý Imanǵalıuly týraly estelikter aıtyldy.
«Qazaq jýrnalıstıkasynyń damýyna zor úles qosqan Nurtileý Imanǵalıuly, Amangeldi Seıithan jáne Beısen Quranbekti eske alýǵa arnalǵan jarystyń oıdaǵydaı ótýine tilektespin. Osyndaı ıgi shara uıymdastyrýshylaryna alǵysym sheksiz», dedi Qarlyǵash Sovetbekqyzy.
О́z kezeginde Gúlmıra Zerbaı jarysqa qatysýshylarǵa sáttilik tilep, «Beısen jáne bolmys» kitabyn tartý etti.
Shara aıasynda Begasyl Seıithanov ákesi týraly esteliktermen bólisti.
«Ákem qazaq sportynyń damýyna ózindik úlesin qosty. Fýtboldy jaqsy kórip, biraz jyl ózi de dop tepti. Osyndaı ıgi sharalar jalǵasyn taba berse eken deımiz», dedi B.Seıithanov.
Dodaǵa barlyǵy 8 komanda, atap aıtqanda, Jetisý oblysynan kelgen «Qareket» komandasy, Ekspress K, Qazcontent, Meta-ratings.kz, qos qurammen kelgen Qazmedıa ortalyǵy, «MonkeyMediaKZ» jáne uıymdastyrýshylardyń komandasy tústi.
Toptyq synnan súrinbeı ótken 4 komanda jartylaı fınalda ózara baq synasty. A tobynyń kóshbasshysy «Meta-ratings.kz» komandasy V tobynan ekinshi orynmen shyqqan Qazmedıa 2 komandasyna jol berse, V tobynyń kóshbasshysy «Ekspress K» komandasy Qazmedıa 1 komandasynan aılasyn asyra almady. Qos oıynnyń da nátıjesi 1:0 bolyp tirkeldi.
Júldeli úshinshi oryn úshin bolǵan oıynda «Meta-ratings.kz» komandasy eki dop aıyrmasymen «Ekspress K» komandasyn tize búktirdi.
Sóıtip, qos qurammen kelgen Qazmedıa ortalyǵy komandalarynyń joldary aqtyq synda túıisti. Tartysty ótken oıyn negizgi ýaqytta 3:3 esebimen aıaqtalyp, penaltı serııasy boıynsha Qazmedıa 1 komandasy jeńiske jetti.
Týrnır qorytyndysy boıynsha «Úzdik qaqpashy» atalymy «Ekspress K» komandasynyń qaqpashysy Qanat Bazylhanǵa buıyrsa, «Úzdik qorǵaýshy» atalymyna Qareket» komandasynyń qorǵaýshysy Azamat Shedınbaı ıe boldy. «Úzdik shabýylshy» bolyp Qazmedıa 2 komandasynyń shabýylshysy Shyńǵys Erǵalıev tanylsa, jaqsy oıyn-órnegin kórsetken «Meta-ratings.kz» komandasynyń oıynshysy Murager Muratov «Úzdik oıynshy» atandy.
Aıta keteıik, jeńimpazdar men júldegerler jáne jekeleı atalymdar boıynsha úzdik dep tanylǵan oıynshylar dıplommen, arnaıy kýbokpen jáne aqshalaı syılyqpen marapattaldy.
