Konferensııanyń negizgi ǵylymı baıandamasyn EUÝ professory Ulbosyn Esenbekova «Sıfrlyq dáýirdegi televızııa: jańa kezeńdegi qyzmeti men aýdıtorııa talǵamynyń evolıýsııasy» taqyrybynda jasady. Ǵalym sıfrlyq dáýirdegi buqaralyq kommýnıkasııa quraldary buryn adamnyń qııaly jetpeıtin transformasııa týdyrǵanyn, aqparattyq qoǵam men joǵary tehnologııalar dáýirinde ulttyń tilin, mádenıeti men rýhanı bolmys-bitimin saqtaý, ony jańa jaǵdaıǵa beıimdeý kúrdeli problemaǵa aınalǵanyn aıtty.
XX ǵasyr men XXI ǵasyrdyń toǵysynda bastalǵan tehnologııalyq serpilis jyldan jylǵa kúsheıip, joıqyn aqparattyq tasqynǵa ulasty. Oǵan qarsy bolar tosqaýyl da joq, odan jasyrynyp ta qala almaısyń. Aqparattyq daýylda jutylyp ketpes úshin jańa tehnologııalyq ortaǵa beıimdelip, órkenıet kóshinen qalmaı, damýdyń sapaly baspaldaǵyna kóterilý kerek. Basqasha tańdaý joq.
«Búgingi qoǵamnyń talaby – kórermenge oı salyp, sanasyna ulttyq boıaýlarmen áser etetin ulttyq televızııa. Ulttyń, qoǵamnyń gýmanıtarlyq suranystaryna sáıkes, ártúrli sosıýmnyń qyzyǵýshylyǵyn týǵyzatyn, ulttyq múddeniń janashyry bolatyn televızııa jasaýǵa bolady. Ol úshin otanshyldyq rýhtaǵy kásibı mamandar men jańa ıdeıalardy toqtaýsyz generasııalaıtyn shyǵarmashyl toptyń birikken ujymdyq qyzmeti qajet», dep U. Esenbekova oramdy oıyn ortaǵa saldy.
Professor ulttyń úzdik televızııasyn ǵylymı zertteýlerge arqa súıegen, ǵylymı negizde jumys isteıtin, sıfrlyq áleýeti men mádenıeti joǵary qoǵam ǵana jasaıtynyn, bizde bundaı áleýet qalyptasyp kele jatqanyn jetkizdi.
Basqosýda ýnıversıtet rektory Erlan Sydyqov jańa zamandaǵy televızııanyń ornyn, qoǵamdyq úderisterge yqpalyna, jahandaný zamanynda jan-jaqtan aqparattardy suryptap, ulttyq qundylyqtarymyzdy dáripteýde televızııanyń orny erekshe ekenine toqtaldy. Sondaı-aq ol ár jyldary Qazaq televızııasyn basqarǵan tulǵalardyń, shyǵarmashylyq ujymnyń eren eńbegin erekshe atap ótti.
Konferensııada aıtylǵan taǵy bir tyń oı – Qazaq televızııasy ataýy tutastaı jalpy ulttyq aqparat keńistiginde jumys istep jatqan barlyq qazaqstandyq telearnalarǵa tán ekendigi. Qazaq eliniń efırinde 1958 jyly bastalǵan habar taratý – barlyq otandyq telearnalarǵa ortaq mereke. О́ıtkeni eń alǵash telesıgnal taratý kúni barlyq televızııa salasynyń mamandary men telejýrnalısterge ortaq aıtýly meıram bolýy tıis. Qazaq televızııasynyń mereıtoıy – eldegi barlyq telearnalardyń meıramy.
Halyqaralyq konferensııany júrgizgen EUÝ-diń Jýrnalıstıka jáne saıasattaný fakýltetiniń dekany professor Qaırat Saq óziniń qorytyndy sózinde Qazaq televızııasynyń 65 jyldyq mereıtoıyna arnalǵan jıynnyń mazmundy ótkenin aıtyp, konferensııa jumysyna onlaın qatysqan sheteldik ǵalymdarǵa alǵysyn bildirdi.
Eýrazııa Ulttyq ýnıversıtetinde uıymdastyrylǵan is-shara tórt seksııa boıynsha jalǵasty. Seksııalarda moderator bolǵan Teleradıo jáne qoǵammen baılanys kafedrasynyń meńgerýshisi, belgili aıtysker aqyn Serikzat Dúısenǵazy jáne kafedranyń oqytýshylary konferensııanyń qorytyndy usynymdaryn ázirledi.
