Osydan bir kún buryn Eńbek jáne halyqty áleýmettik qorǵaý mınıstri Tamara Dúısenova qujatty depýtattarǵa tanystyrdy. Sóz barysynda mınıstr jańa áleýmettik saıasat Memleket basshysy jarııalaǵan aýqymdy ózgeristerdiń biri ekenin atap ótti.
«Bul ózgeristerdiń negizi nazarlaryńyzǵa usynylyp otyrǵan Áleýmettik kodeks jobasynda kórinis tapty. Birinshiden, memlekettik áleýmettik qoldaý júıesiniń paradıgmasyn túbegeıli ózgertý usynylady: ıaǵnı ol áleýmettik syn-qaterlerdiń saldaryn joıýǵa emes, kerisinshe ómirlik qıyn jaǵdaılardyń aldyn alýǵa kóbirek baǵyttalatyn bolady. Ekinshiden, áleýmettik salany sıfrlandyrýdy tereńdetý jáne sonyń arqasynda áleýmettik qoldaýdy alýdyń búgingi ótinish berý nysanynan, adresti anyqtaý nysanyna jáne ony proaktıvti formatta kórsetý júıesine kóshý qarastyrylǵan. Úshinshiden, azamattardy áleýmettik qamsyzdandyrý boıynsha jaýapkershilik tek memleketke ǵana emes, jumys berýshige jáne azamattyń ózine de júkteletin bolady. Bul jańa áleýmettik kontrakt negizinde iske asyrylady. Tórtinshiden, nátıjeli jáne formaldy jumyspen qamtýdy yntalandyrýǵa baǵyttalǵan saqtandyrý júıesin damytý kózdelip otyr», dedi Tamara Dúısenova.
Sonymen qatar EHÁQM basshysy Áleýmettik kodeksti ázirleý barysynda halyqaralyq tájirıbe muqııat zerdelengenin aıtty. Sonyń nátıjesinde Áleýmettik kodekstiń qurylymy basshylyqqa alynyp, óz elimizdiń erekshelikteri jan-jaqty eskerildi.
