Eń birinshi bolyp qazaqstandyqtar Koreıa men Japonııada daýys berýge múmkindik aldy. Osylaısha, Seýlde №258 jáne Tokıoda 261 saılaý ýchaskeleri jergilikti ýaqyt boıynsha saǵat 07.00-de ashyldy. Seýl qalasynda bilim alyp júrgen kýrsant Elnur Asanov óz tańdaýyn eń alǵashqy bolyp jasady.
«Bul saılaý elimiz úshin ekonomıkalyq damýdyń jańa múmkindikterin ashady dep kútemin. Transformasııa bizdiń memleketimiz úshin qajet, ol eldiń durys baǵytta damýyna qýatty serpin beredi dep senemin. Men Qazaqstan Respýblıkasynyń azamaty retinde azamattyq boryshymdy oryndap, óz úlesimdi qosqym keledi! Elimizge nyǵaıyp, órkendeý tileımin», dedi E.Asanov.
Budan keıin Beıjiń, Shanhaı, Gonkong, Sıngapýr, Kýala-Lýmpýr, Ulan-Batyr qalalarynda daýys berý ýchaskeleri óz jumysyn bastady. Sondaı-aq Djakarta, Bangkok pen Hanoı qalalarynda saılaý ýchaskeleri ashyldy. Osylaısha, birinen keıin biri ýaqyt beldeýine sáıkes iri qalalarda ornalasqan saılaý ýchaskeleri jumysqa kiristi. Elshilikter taratqan málimetterge súıensek, azamattarymyz saılaýǵa belsendi qatysyp jatyr.
Qytaı elindegi saılaý ýchaskeleri Astana ýaqyty boıynsha saǵat 18.00-de jabyldy. Esterińizge sala keteıik, Qytaı Halyq respýblıkasynda otandastarymyz 3 saılaý ýchaskesinde daýys berdi. Kelýshiler ortasha eseppen 98 paıyzdy qurady. Stýdentter, dıplomattar jáne olardyń otbasy músheleri, sondaı-aq osy elde jumys isteıtin el azamattary óz tańdaýlaryn jasady. Daýys berýshiler sanynyń ósýine Qytaıdaǵy koronavırýsqa baılanysty shekteýler alynyp, shekaranyń ashylýy yqpal etti.
Máselen, Máskeýdegi saılaý ýchaskesinde birinshi bolyp Reseı Syrtqy ister mınıstrligi Dıplomatııalyq akademııasynyń 2-kýrs stýdenti Daıana Kóshimova daýys berdi. «Men ómirimde birinshi ret daýys berip otyrmyn. Eń aldymen, óz tańdaýymdy elimizdiń ıgiligi úshin jasadym. Qazaqstandyqtar baqytty ómir súrýdi úırenýi kerek, óıtkeni biz oǵan laıyqpyz», dep óz oıymen bólisti D.Kóshimova.
Al Reseı Qorǵanys mınıstrliginiń Knıaz Aleksandr Nevskıı atyndaǵy Áskerı ýnıversıtetiniń 2-kýrs kýrsanty Eleýhan Shadyman saılaýǵa alǵashqylardyń biri bolyp keldi. «Elimnen jyraqta júrsem de, ózimniń azamattyq boryshymdy óteý – men úshin jaýapty is. Búgingi saılaý biz úshin mereke, Máskeýdegi qazaqtar bolyp jınalyp, daýys berýge keldik», deıdi Eleýhan Shadyman.
Reseıdegi Qazaqstannyń elshiligi janyndaǵy saılaý ýchaskesine Máskeý oblysynyń Dýbna qalasyndaǵy Birikken ıadrolyq zertteýler ınstıtýtynda jumys isteıtin qazaqstandyq ǵalymdar barǵan eken. Instıtýt ujymy saılaýda daýys berý úshin avtobýspen 100 shaqyrym jol júrip ótken.
«Birikken ıadrolyq zertteýler ınstıtýtyndaǵy dıasporada júzge jýyq adam bar. Olar jas ǵalymdar, ortasha jasy 28-de. Parlament – bıliktiń basty tarmaqtarynyń biri. Bizdiń múddelerimizdi qorǵaıtyn zań shyǵarýshy organ. Sondyqtan azamattyq ustanymymyzdy bildirip, daýys berýge keldik», dedi Birikken ıadrolyq zertteýler ınstıtýtyndaǵy ulttyq toptyń jetekshisi, Almaty qalasy Iаdrolyq fızıka ınstıtýtynyń aǵa ǵylymı qyzmetkeri Erjan Muhamedjanov.
Moldovada temirjol ınfraqurylymyn jańǵyrtý jobasyna tartylǵan «Temirjol jóndeý» kompanııasynyń qyzmetkerleri Kıshınevte daýys berdi. Tús qaıta Soltústik Amerıkada Vashıngton, Nıý-Iork jáne Ottavada saılaý ýchaskeleri jumys isteı bastady. San-Fransıskoda sheteldegi sońǵy saılaý ýchaskesi ashyldy.
Bishkekte №264 saılaý ýchaskesinde jergilikti ýaqyt boıynsha saǵat 20.00-de daýys berý aıaqtaldy. Ýchaske tóraǵasy Nurlan Ǵylmanovtyń aıtýynsha, daýys berýshilerdiń qatysýy 39,6 paıyzdy quraǵan. Jalpy, Qyrǵyzstandaǵy elshilikte 300 adam tirkelgen.
«Bishkektegi №264 saılaý ýchaskesine jergilikti ýaqyt boıynsha saǵat 20.00-de tirkelgen saılaýshylardan 119 qazaqstandyq daýys berýge keldi, bul 39,6 paıyzdy qurady. Daýystar sanalyp, bıýlletender resimdelip bolǵannan keıin sońǵy qorytyndy shyǵarylady», dedi N.Ǵylmanov.
Qyrǵyzstandaǵy Qazaqstan Respýblıkasy Parlamenti Májilisi depýtattaryn kezekten tys saılaýynda TMD Parlamentaralyq Assambleıasynyń halyqaralyq baıqaýshylary men «Bostandyq qanaty» qoǵamdyq qorynyń táýelsiz baıqaýshysy baqylady.
О́z tańdaýyn jasaǵandar qatarynda qazaqstandyq dıplomattar men olardyń otbasy músheleri, halyqaralyq jáne jeke kompanııalardyń ókilderi, sonymen qatar atalǵan elde bilim alyp jatqan stýdentter bar.
Qazaqstannyń Tájikstandaǵy Elshiligi janynan ashylǵan №272 saılaý ýchaskesinde atalǵan el aýmaǵynda ýaqytsha jáne turaqty turyp jatqan 100-den astam Qazaqstan azamat engizilgen. Otanyndaǵy saıası ózgeriske ún qosýǵa umtylǵan qazaqstandyqtar Tájikstannyń túkpir-túkpirinen Dýshanbege kelip daýys berdi. Elshilik qyzmetkerleri saılaýdyń ashyq ári ádil ótýine, ýchaskeniń úzdiksiz jumys isteýine bar kúshin salyp jatqanyn aıtyp otyr.
«Otandastarymyz saılaýǵa belsendi qatysyp jatyr. Tańǵy saǵat 7.00-den saılaý ýchaskesine qazaqstandyqtar kele bastady. Tizimge Tájikstan aýmaǵynda ýaqytsha jáne turaqty turyp jatqan qazaqstandyqtar engizilgen. Onyń negizgi bóligi – birlesken kásiporyndardyń qyzmetshileri, dıplomattardyń otbasy, stýdentter men týrıster», deıdi saılaý ýchaskesiniń tóraǵasy Darhan Kósherbaev.
Aıta keterligi, sheteldegi barlyq saılaý ýchaskeleri Qazaqstannyń dıplomatııalyq ókildikteriniń aýmaqtarynda uıymdastyrylǵan. 12 016 adam daýys berýge quqyly. Ortalyq saılaý komıssııasynyń málimetine sáıkes, Astana ýaqytymen keshki 19.00-de sheteldegi 11 ýchaskelik saılaý komıssııasynyń (Seýl, Tokıo, Pekın, Sıngapýr, Kýala-Lýmpýr, Ulan-Bator, Gonkong, Shanhaı, Bangkok, Djakarta jáne Hanoı) jumysyn aıaqtady.
Jalpy alǵanda 5 071-ge jýyq Qazaqstan azamaty daýys berdi, ıaǵnı qatysý kórsetkishi 41,8 paıyzdy qurady. Al qalǵan 66 ýchaske jumysyn jalǵastyryp jatyr.
