Naýryz merekesiniń qarsańynda kásiporynnyń 50 qyzmetkeri óz úıiniń kiltin aldy. Olardyń qatarynda kópbalaly jáne tolyq emes otbasylar, sondaı-aq óndiristegi negizgi jáne ónerkásiptegi erek mamandyq ıeleri de bar.
– Metallýrgter «Otbasy bank» AQ-nyń ERG mamandary úshin arnaıy ázirlengen biregeı baǵdarlamasy boıynsha – bastapqy jarnasyz ári jaldaý-jınaqtaý tetigimen páter aldy. Alǵashqy 8 jyl ishinde qyzmetkerler eń tómengi jaldaý aqysymen osy páterlerde turady. Osy kezeńde olar «Otbasy bankindegi» depozıtterinde páter qunynyń 50% -yn jınaqtaýǵa tıis. Bul shart oryndalǵan kezde, páter qunynyń qalǵan 50%-yn «Otbasy bank» olarǵa jyldyq 3,5%-ten 5% mólsherlememen turǵyn úı zaımy retinde bermek. Sodan keıin baspana kompanııadan satyp alynady. Bul páterlerdiń quny búgingi naryqtaǵy baspana baǵasynan edáýir arzan, deıdi biletin mamandar.
«Qazaqstandyq elektrolız zaýyty» AQ bas dırektory Andreı Batrachenko qutty qonys ıelerine páter kiltterin tabystap, jumysshylardy ulyq mereke – Ulystyń uly kúnimen quttyqtap sóz sóıledi.
– Naýryz – jyl basy. Osy kóktemgi meıram qarsańynda bizdiń qyzmetkerdiń óz shańyraǵyna kirip, úıli bolyp jatqany qatty qýantady. Qyzmetkerlerdiń ómir súrýine qolaıly jaǵdaı jasaý – kompanııanyń áleýmettik saıasatynyń ajyramas bóligi. Biz olardyń ómirin udaıy jaqsartýǵa tyrysamyz. Kópten beri kezek kútip, páter kiltin búgin alǵandardyń barlyǵyna jańa baspanada baq pen bereke ornasyn dep tileımin, dedi ol.
– Jumys berýshiniń mundaı qoldaýy baspanaly bolýǵa talpynǵandarǵa úlken úmit syılaıtyny anyq. Biz kásiporyndarmen birlesip azamattardyń turǵyn úı máselesin jedel sheshýge yqpal etemiz. Al bul jumys berýshi tarapynan áleýmettik paketti kúsheıtýdiń taǵy bir amaly, dedi qýanysh jıynyna qatysqan «Otbasy bank» AQ Pavlodar oblystyq fılıalynyń dırektory Talǵat Baılov.
On qabattan turatyn ǵımarat qalanyń eń jaqsy aýdandarynyń birinde ornalasqan. Jaqyn mańda jolaıryq bar. Infraqurylymy jaqsy. Jaıly ómir súrýge qajet nárseniń bári taıaq tastam jerde. Mektepter, balabaqshalar men aýrýhanalar tipten tıip tur eken.
Zaýyt ustasy – Elmurat Parmanovtyń tórt balasy bar. Ol kópbalaly otbasy retinde baspanaly bolyp jatyr. Zaýyttyń irgetasy qalanǵan sátten beri osynda jumys isteıdi. Aldymen onyń qurylysyna qatyssa, búginde súıikti kásipornynan baspana aldy.
– Men sııaqty otbasylar úshin tamasha múmkindik. Osy baǵdarlamaǵa qatysý baqytyna ıe bolǵanymyzǵa óte qýanyshtymyn. Buǵan deıin biz qala mańyndaǵy aýylda jaldamaly úıde turýǵa májbúr boldyq. Endi «О́z úıim – óleń tósegim bar». Balalarym Naýryz meıramy qarsańyndaǵy ataýly syılyqqa erekshe qýanyshty. Endi úsh bólmeli páterde olardyń árqaısysynyń keń de jaıly óz orny bolady, dedi usta.
Al turǵyn úı baǵdarlamasynyń sharttary otbasy bıýdjetine salmaq bolmaıdy. Alǵashqylardyń biri bolyp páter kiltin alǵan qoıma jáne qosalqy jumystar sehynyń qoımashysy, erli-zaıyptar Móldir Ábjanova men Baýyrjan Dermenov te qýanyp jatyr. Baýyrjan zaýytta elektr-gazben dánekerleýshi bolyp qyzmet etedi.
– Zaýyt meniń jáne otbasym úshin tek jumys orny ǵana emes. Kásiporyn meniń jeke tulǵa retinde de, kásibı maman retinde qalyptasýym úshin septesken úlken ustahana. Munda men jan jarymmen tanystym, al búgin páterdiń kiltin aldym. Endeshe, Ulystyń uly kúninde erekshe baqyttymyz, dedi qýanyshyn jasyrmaǵan Móldir Ábjanova.
Sońǵy eki jylda «Otbasy banki» arqyly Eýrazııalyq top qyzmetkerlerine 485 páter satylǵan. Onyń 79-y «Qazaqstandyq elektrolız zaýyty» metallýrgterine buıyrǵan. Osyndaı ıgi baǵdarlamalardy júzege asyra otyryp, ERG qyzmetkerlerin turǵyn úımen qamtamasyz etý jalǵasa bermek.
Al «Otbasy bank» óz kezeginde azamattardy qoljetimdi jáne sapaly turǵyn úımen qamtý jónindegi memlekettik saıasattyń maqsattaryn úzbeı oryndaı berýdi basshylyqqa alǵan.
