Soltústiktegi naýryz shyraıy

Munda Naýryzdyń kelýine baılanysty teatrlandyrylǵan kórinister, jergilikti ónerpazdar men shaqyrylǵan meımandardyń kóńildi konsertteri ótip jatty. Ásirese, respýblıkaǵa belgili ánshi Birjan Esjannyń dombyramen áýelete salǵan ánderi qalanyń alys jerlerine deıin estilip turdy. «Orda» toby da ózderiniń ónerin pash etti.

Birazdan soń bas sahnaǵa oblys ákimi Aıdarbek Saparov shyǵyp, turǵyndardy merekemen quttyqtady. «Halqymyz uly kúnge balap, jyl basy sanaǵan jasampaz Naýryz – birlik pen bereke meıramy. Bul kún dastarhanǵa aq tolatyn, elimizge baq qonatyn araıly shattyq kúni. Halyqty din men dilge, til men túrge bólmeıtin Naýryz meıramy táýelsizdik jyldary ulysymyzdy uıystyra tústi. Qazir Naýryz úsh kún boıy atalyp ótiletin elimizdegi eń úlken, eń ulyq merekege aınaldy», degen ákim el Prezıdentiniń «Aýyl – el besigi» baǵdarlamasynyń halyqtyń ál-qýatyn jaqsartýǵa arnalǵanyn eske saldy jáne oblystyń ekonomıka men áleýmettik saladaǵy jetistikterine toqtalyp ótti.

Aldaǵy ýaqytta atalyp ótile­tin mádenı sharalar qa­ta­ryn­da bıyl Qojabergen jy­raýdyń 360, Shal aqynnyń 275, Aqan seriniń 180, Maǵjan Jumabaevtyń 130 jyldyǵy bar ekeni aıtyldy. So­nyń ishinde M.Juma­baevtyń 130 jyldyǵyna arnalǵan sharalardyń bastalyp ketkenin jetkizdi. «Jýyr­da ǵana Maǵjannyń 30 óleńin jatqa aıtý konkýrsyna Petropavl qalasy men aýdandarymyz­dan túrli etnos ókilderi arasynan 300-ge jýyq oqýshy qatysty. Onyń 70-i konkýrstyń fınaldyq bóligine joldama alyp, júlde aldy. Endi halyqaralyq aıtysqa daıyndyq júrip jatyr», dedi ol. Sonymen birge ákim keshegi ótken saılaýdyń eldi demokratııalyq ózgeristerge bastaıtyn mańyzdy shara bolǵanyna senim bildirdi.

Osy jerde oblystyq ardagerler keńesiniń tóraǵasy, keshe ǵana Astana qalasynda TMD Úılestirý keńesiniń tóraǵasy M.Volkovtyń qolynan TMD ardagerleri keńe­siniń «Qurmet» belgisin alǵan Eskendir Eleýsizov aǵamyzdy áńgimege tarttyq. «Halqymyzdyń kóńili árqashan jaıly bolyp, elimizdegi yntymaq pen birlik berik bolsyn! Sonda yrysymyz da mol bolady», degen tilegin jetkizdi aqsaqal.

Bul kúni asyq atý, kúres sııaqty ulttyq oıyndardan jarystar, al alqaqotan japsarlasa qonǵan kıiz úılerde qolóner sheberleriniń týyndylarynyń kórmesi ótti. Naýryz kóje sapyrylyp, ulttyq taǵamdardyń býy burqyrap jatty.

Soltústik Qazaqstan oblysy