Pavlodar qalasy ákiminiń orynbasary Arslan Qalııaqbarovqa memlekettik satyp alýlardaǵy zań buzýshylyqtar úshin 4,1 mıllıon teńge aıyppul salyndy. Quqyq buzýshylyq Qalıakbarov qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy bolǵan kezeńde oryn alǵan.
Sot otyrysynda keltirilgen málimetterge sáıkes, Qalıakbarov 2022 jyly bir kózden alý tásilimen 17 tikeleı memlekettik satyp alý shartyn jasasqan, onyń ishinde qala alańdaryn, saıabaqtardy, kóshelerdi jóndeý jáne kútip ustaý, ataýy ózgertilgen kóshelerge belgilerdi daıyndaý, konteıner alańdary, zırat qorshaýlary jáne jaǵalaýdy abattandyrý sekildi jobalar bar. Jasalǵan memlekettik satyp alý týraly sharttardyń jalpy somasy eki mıllıard teńgege jýyqtady.
Sybaılas jemqorlyqqa qarsy qyzmet agentiginiń Pavlodar oblysy boıynsha basqarmasynyń qyzmetkerleri kelisim-sharttardyń zań buzýshylyqpen, tıisti konkýrstyq rásimdersiz jasalǵanyn anyqtap, bul týraly Qazaqstan Respýblıkasy Qarjy mınıstrliginiń Ishki memlekettik aýdıt komıtetine jáne oblystyq departamentke habarlaǵan.
«Atalǵan derek boıynsha Pavlodar oblysy boıynsha ishki memlekettik aýdıt departamenti laýazymdy tulǵa A.S.Qalıakbarovqa qatysty QR ÁQBtK-niń 207-babynyń 11-bóligimen 17 ákimshilik quqyq buzýshylyq týraly is qozǵady, sot olardy bir iske biriktirdi», dep habarlady sot keńsesi.
Qalıakbarovtyń sotta Pavlodar qalasynyń turǵyn úı-kommýnaldyq sharýashylyq bóliminiń basshysy retinde barlyq 17 kelisim-shartty jasap, oǵan qol qoıǵanyn rastaı otyryp, anyqtalǵan buzýshylyqtar boıynsha óz kinásin moıyndamaǵany atap ótilgen.
Arslan Qalııakbarovanyń advokaty ákimshilik isti toqtatýdy surady. Sot sheneýniktiń ýájderin negizsiz dep tapty.
«Pavlodar qalasynyń Ákimshilik quqyq buzýshylyq ister jónindegi mamandandyrylǵan soty Qalıakbarovty ÁQBtK-niń 207-babynyń 11-bóligi boıynsha kináli dep tanyp, 17 quqyq buzýshylyqtyń árqaısysy úshin 100 AEK mólsherinde aıyppul salý túrindegi ákimshilik jaza qoldaný týraly sheshim qabyldady. Bul rette, ÁQBtK-niń 829-11-babynyń 2-bóliginiń negizinde sot ákimshilik aıyppul somasyn 30 paıyzǵa, ıaǵnı 1 190 AEK-ke deıin azaıtýdy múmkin dep sanaıdy. Salynǵan aıyppuldyń jalpy somasy 4 105 500 teńge», delingen sot keńsesinde jarııalanǵan qaýlyda.
Sot úkimi zańdy kúshine engen joq.
