Batýmıde Naýryz merekesi toılandy

Qazaqstannyń Grýzııadaǵy elshisi Málik Myrzalın óziniń quttyqtaý sózinde Naýryzdyń beıbitshilik pen meıirimdilikti beıneleıtinin, qýanysh pen súıispenshilikke toly, tereń fılosofııalyq máni men jalpyálemdik mádenı mańyzy bar, birlik pen kelisim merekesi, sondaı-aq dostyq pen ózara syılastyqty nyǵaıtýǵa yqpal etetin shyn máninde jalpyhalyqtyq meıram ekenin atap ótti. 

Adjarııa Joǵarǵy keńesiniń vıse-spıkeri Tıte Aroshıdze de quttyqtaý sóz sóılep, halyqtar arasynda tyǵyz dostyq qarym-qatynas ornatýda halyqaralyq Naýryz merekesiniń mańyzdylyǵy men ózektiligin atap ótti. Adjarııa astanasynda Naýryz merekesin ótkizgeni úshin Qazaqstan elshiligine alǵysyn bildirip, atalǵan is-shara Qazaqstan men Grýzııa arasyndaǵy mádenı-gýmanıtarlyq yntymaqtastyqqa taǵy bir jańa úles bolatynyna senim bildirdi. 

Is-shara aıasynda qazaq mádenı murasynyń ásemdigi men baılyǵyn kórsetetin bata berý men shashý qazaqtyń salt-dástúrleri kórsetildi. Qonaqtar asyq atý, arqan tartý jáne basqa da ulttyq sport túrleri boıynsha jarystarǵa qatysty. 

Mádenı baǵdarlama barysynda Mańǵystaý oblysynan arnaıy kelgen «Aq Shaǵyl» etno-folklorlyq toby men «Jorǵa» bı ansambli óz ónerlerin kórsetti. Qazaq shyǵarmalarynyń kóne ulttyq mýzykalyq aspaptarda vırtýozdyq oryndalýy jáne dástúrlerimizdi kórsetetin halyq bıleri kórermenderdiń qoshemetine bólendi. 

Mereke qonaqtary, Batýmı turǵyndary men týrısteri arnaıy tigilgen qazaq kıiz úıinde ornalasqan A. Kekilbaev atyndaǵy Mańǵystaý oblystyq tarıhı-ólketaný murajaıynyń zergerlik buıymdarymen, ulttyq kıimderimen qýana tanysty.

Dástúrli qazaq taǵamdarynyń baı máziri jáne kóktemniń basty taǵamy – Naýryz kójemen merekelik dastarhan jaıyldy. Naýryzdy merekeleýdiń sharyqtaý shegi tusaýkeser dástúrli rásimin ótkizý boldy.