Naýryz toıy men dombyra músininiń ashylýyna Halyq qaharmany, tuńǵysh ǵaryshker Toqtar Áýbákirov qatysyp, sóz sóıledi. Qazaqtyń qara dombyrasy men ulttyq qundylyqtardyń qaı-qaısyna bolsyn qamqorlyqpen qaraý keregin qaperledi ol sózinde. «Ulys oń bolyp, urpaq sanasy jetile túsýi úshin mundaı bastamalar jerde qalmaýy tıis» deıdi ol.
Kópshilik aldynda sóz sóılegen Halyq qaharmany T.Áýbákirovtiń ıyǵyna oqaly shapan jabyldy. Ǵaryshker bolsa halyqtyń bul joralǵysyna alǵysyn bildirip, ony Astana qalasy Almaty aýdanynyń ákimi Maqsat Samatulynyń ıyǵyna kómkerdi. Aýdan ákimi jıylǵan kópshilikti merekemen quttyqtap, jyly lebizin bildirdi.
Astana qalasy Almaty aýdanynyń ákimdigi, «Ulttyq múdde keńesi» qoǵamdyq birlestigi jáne «Kúı anasy» respýblıkalyq qory uıymdastyrǵan dúbirli dýmanda kúıshi-kompozıtorlar alańyna kıiz úıler tigilip, qazan kóterildi. Kópshilik naýryzkójeden dám tatty. Kúı tartylyp, kópshilikke bata berildi. Kúıshi Dına Nurpeıisovanyń eskertkishine gúl shoqtary qoıyldy. Basty jańalyq – tuǵyrymen eseptegende 5 metr bolatyn dombyra músininiń ashylǵany der edik.
«Astana qalasy ákimdiginiń qoldaýymen Dına eskertkishi mańynda mýzykalyq sýburqaq ornatý josparda bar. Bul jer demalys aımaǵyna aınalmaq. Táýlik boıy qazaq kompozıtorlarynyń kúıleri men ánderi oryndalatyn bolady. Ár adam ózin Qazaq eliniń azamaty ekenin sezinýi úshin osyndaı ister qolǵa alynyp jatyr. О́ner ujymdarynyń kúı tartýyna arnalǵan ashyq sahna alańyn salý kózdelip otyr. Igi bastamany qoldaǵan sizderge kóp raqmet», dedi «Kúı anasy» respýblıkalyq qorynyń jetekshisi Tólegen Qýanyshev.
Qoǵam qaıratkeri, jýrnalıst Serik Erǵalı jyl basy Naýryz meıramynyń ereksheligine toqtalyp, ulttyń tól ónerin jas urpaq sanasyna sińirýge barshamyz múddeli bolýymyz keregin aıtty.
Qazaqstannyń eńbek sińirgen qaıratkeri, professor, kúıshi Orynbaı Dúısen Dınanyń «Toıbastaryn» tartyp, tyńdarmandardyń ystyq yqylasyna bólendi.
