Bilim ordasyn bıyl bitirgeli otyrǵan ozyq oıly shákirtterdiń arasynda Abylaı Amangeldiuly men Polına Vardashko da bar. Erkin eldiń erteńine senetin órender sabaqty úzdik oqıdy. Túrli bilim baıqaýynan júldeli oryndardy ıelengen. Ekeýi de bilimge qushtarlyqtyń alǵashqy jemisin kóre bastady. Jaqynda Abylaı Germanııanyń Bremen qalasyndaǵy Jacobs Bremen University-niń Computer Science fakýltetinde tegin bilim alý grantyn ıelendi.
– Eýropadaǵy jetekshi joǵary oqý ornynda bilim alý – úlken múmkindik. Bala kezimnen Germanııada oqýdy armandap edim. Maqsatym – IT-salanyń bilgir mamany ataný, – deıdi Abylaı.
Al Polına Kanadanyń Toronto ýnıversıtetinde bıotehnologııa mamandyǵy boıynsha tegin oqýǵa shaqyrtý alyp otyr. Oǵan buǵan deıin Germanııadaǵy Jacobs Unieversity, AQSh-tyń Drexel University, Kanadadaǵy Carleton University jáne University of Ottawa sekildi joǵary oqý oryndarynan shaqyrtý men bilim granttary kelgen.
– Birneshe jyldan beri Toronto ýnıversıtetine oqýǵa túsýdi oılastyrǵan edim. Bolashaqta bıotehnologııany jetildirip, farmasevtıka ındýstrııasyn damytýdy kózdep júrmin. Joǵary bilim alǵan soń túrli vaksına oılap tapqym keledi, – deıdi Polına.
Atyraý oblysy
