Aıtysta Qyrǵyzstan, Mońǵolııa, О́zbekstan, Qytaı aqyndarymen qatar elimizdiń barlyq joǵarǵy oqý oryndarynyń elýge jýyq jas júırikteri baq synaıdy. Jastar alamanyna ASSYLTAS qoǵamdyq qorynyń quryltaıshysy Dýlat Tastekeev qarjylaı qoldaý kórsetedi.
Aıtysqa QR Eńbek sińirgen qaıratkeri, Aıtys aqyndary men jyrshy-termeshilerdiń Halyqaralyq odaǵynyń basqarma tóraǵasy Júrsin Erman, QR Mádenıet qaıratkeri, belgili aıtysker aqyn Serik Qalıev, «Alataý» dástúrli óner teatrynyń dırektory, aıtysker Rınat Zaıytov, Aıtysker aqyn Ahmetjan О́zbekov, Fılologııa ǵylymdarynyń doktory, professor Baltabaı Ábdiǵazıuly qazylyq etedi.
Sóz báıgesin aıtysker aqyn, O.Dosbosynov atyndaǵy aqyndar mektebiniń jetekshisi Shuǵaıyp Sezimhanuly júrgizedi.
«Meniń pirim – Súıinbaı» dástúrli VII halyqaralyq jas aqyndar aıtysynyń maqsaty – aıtys ónerin jastar arasynda keńinen nasıhattaý, aqyndyq dástúrdi jańǵyrtý, jas aqyndardyń sýyrypsalmalyq qabiletteri men sheshendik ónerin shyńdaý, olardyń kópshilikke tanylýyna múmkúndik jasaý.
Aıtystyń irikteý kezeńi 2023 jylǵy 6-sáýir kúni, saǵat 10:00-de «Abaı atyndaǵy QazUPÝ» Bas oqý ǵımaratynyń №225 akt zalynda ótedi (Dostyq 13).
Qorytyndy kezeńi 2023 jylǵy 7 sáýir kúni, saǵat 14:00-de «Alataý» dástúrli óner teatrynda ótedi.
