Kompanııa asyldandyrý jumystaryn tolyqqandy júrgize almaı otyr. Buǵan qarjy jetispeýshiligi sebep. Jergilikti sarapshylardyń paıymdaýynsha, eger jumys qarqyny jaqsarmasa, asyl tuqymdy Qostanaı jylqysy joıylyp ketýi múmkin.
Ǵalymdar asyl tuqymdy jylqy ósirýmen 60 jyldan astam ýaqyt boıy aınalysyp keledi. 1951 jyldan bastap asyl tuqymdy jylqylar óziniń tózimdiligi jáne júıriktigimen tanymal.
Kásiporyn gúldengen shaǵynda 400-den astam asyl tuqymdy jylqy bolǵan. Qazir bul kórsetkish 10 ese azaıǵan.
«Tıisti deńgeıde qarjylandyrý bolmaǵan soń jumys qarqyny baıaýlap qaldy. Sapaly mamandarymyz kete bastady. Jylqy sany da birshama azaıyp ketti. Býdandastyrýǵa qatysty zertteý jumystary júrgizilip jatqan joq. Ári eshqandaı synaqtar júrgize almaı otyrmyz. Qazir múlde damý joq dese de bolady», deıdi «Qazaq tulpary» jylqy zaýyty JShS basqarma tóraǵasy Aıgúl Amandyqova.
