Oblys ákimdigi tabıǵı resýrstar jáne tabıǵat paıdalanýdy retteý basqarmasynyń basshysy Murathan Shúkeevtiń aıtýynsha, óńirde 2021-2025 jyldar aralyǵynda 140,8 mıllıon kóshet otyrǵyzylýy tıis. Onyń 35,1 mıllıony 2021-2022 aralyǵynda egilgen bolsa, 105,5 mıllıon aǵash 2023-2025 jyldary otyrǵyzylmaq.
«Jalpy alǵanda, «Jambyl oblysynda 2021-2025 jyldary ormandardy molyqtyrý jáne molaıtý týraly» keshendi jospar bar. Soǵan sáıkes, 2023 jyly memlekettik orman qory jerlerine 5670 gektar aýdanǵa 16655,0 myń kóshet otyrǵyzý josparlanǵan. Búgingi kúnge deıin 5670 gektar jerdi daıyndaý jumystary tolyǵymen aıaqtalǵan. О́ńirde kóshet otyrǵyzý jumystaryn 15 sáýirge deıin tolyqtaı aıaqtaý josparlanǵan», deıdi basqarma basshysy.
Ulystyń uly kúni aıasynda kóshet egý jumystaryna áýlıeatalyqtar erekshe qarqynmen kirisip te ketti. Máselen, «Birge Taza Qazaqstan» aksııasy aıasynda Taraz qalasynda kóktemgi kóriktendirý jáne sanıtarlyq tazalyq jumystary júrgizildi. Atalmysh aksııa aıasynda Tóle bı kóshesi, Táýke han kópirinen bastap Tuńǵysh Prezıdent saıabaǵyna deıin, atalǵan saıabaq aýmaǵynda 5 kók shyrsha, 7 jasyl shyrsha, 50 Qyrym qaraǵaıy, 120 ıasen, 6 týıa aǵashy egildi.
Tarazdyqtardyń tamasha bastamasyn shýlyqtar da sátimen jalǵastyrdy. Shý qalasyndaǵy «IQ URKER SCHOOL» mektebindegi «Atańnan mal qalǵansha, tal qalsyn» atty aǵash otyrǵyzý aksııasyna aýdan basshylary da belsene qatysty. Ulystyń uly kúni qarsańynda eńbektegen baladan eńkeıgen qarııaǵa deıin belsendilik tanytyp, mektep mańaıyna tal egip, qazaqy yrym-nıetpen jańadan egilgen jas taldardyń túbine aq quıdy.
Eset DOSALY,
jýrnalıst
Jambyl oblysy
