«Meniń eń jaqsy kóretin quldarym – aýyz ashýǵa asyqqandar», delingen hadıste. Taǵy bir hadıste:
«Adamdar aýyz ashýǵa asyqqan saıyn jaqsylyqta bolady», delingen (Múslım).
Sondyqtan aýyz ashýǵa asyǵý dinimizde mustahab amalǵa jatady. Imam Shafıǵı bir sózinde:
«Kúnniń batqandyǵy anyq bilingennen keıin aýyz ashýdy keshiktirip, óziniń osy áreketin abzal kórgen adam, hadısterge qaıshy amal jasaǵandyqtan, onysy mákrúh bolmaq. Túnde oraza ustaý durys emes. Al keshiktirýdi abzal dep oılamasa (jaǵdaıǵa baılanysty aýyzashardy Ramazan orazasyna qatysty keshiktirse), aǵattyǵy joq», degen (Imam Shafıǵı, «Ál Ýmm»).
Degenmen aýyzashardy keshiktirgen adamnyń orazasy durys sanalady. Sonymen qatar aýyzashar ýaqyty kirgende jol júrse, bir jutym sýmen ne bir túıir qurmamen bolsa da keshiktirmeı ashqany jón.
