Atbasar aýdanyndaǵy Esengeldi, Novomarınovka, Sepe jáne Sochınskoe aýyldarynyń turǵyndary qanshama jyldan beri jol azabyn tartyp keledi. Kóktemgi erigen sý onsyz da tozyǵy jetken joldy shaıyp ketip, tórt aýyldyń turǵyndary qyzyl sýdyń tutqynyna aınalǵan. Áldeneshe kúnnen beri azyq-túlikteri taýsylyp, em-domǵa qajetti dári-dármekke zar bolyp otyr. Amaly taýsylǵandar bastaryn báıgege tigip, seńi kóship jatqan Qashqar ózeninen qaıyqpen ótýde.
Joldyń jaǵdaıyn aıtyp bolmaıdy. Burynǵynyń tilimen aıtqanda, «at ólip, arba synatyn» jaǵdaı. Kóktemde ǵana emes, qaqaǵan qysta da kórgen kúnderi osy. Jalǵyz joldy áýpirimdep tazalaǵandarymen, syrǵyma boran júrse boldy, jym-jylas etip jaýyp tastaıdy. Jol azabyn shegip otyrǵan tórt aýyldyń aptalap qatynassyz qalýy jıi kezdesedi. Osy tyǵyryqtan shyǵaratyn kópir salynýda. Áıtse de Atbasar-Sochınskoe tas jolynyń 19-ynshy shaqyrymyndaǵy kópir qurylysy bastalǵaly eki jyl ótse de, qashan aıaqtalary belgisiz. Dál qazir aınalma joldy kóktemgi qar sýyna meltektep, kúshine mingen Qashqar ózeni shaıyp ketkeli kólik qozǵalysyna shekteý qoıylǵan. Jaýapty organdardyń málimdeýine qaraǵanda, sý deńgeıi túskennen keıin qıyrshyq tas tóselmek. Qazir bes qutqarýshy jol boıyndaǵy halyqty ózennen ári-beri ótkizip júr.
Ahýal ábden alańdatarlyq. Aıaqastynan oryn alǵan jaı bolsa bir sári, sińirdeı sozylǵan, súr bolyp qatqan máseleniń áldeneshe jyl boıy sheshilmeı qoıǵanyna eldiń ókpesi qara qazandaı.
Aqmola oblysy,
Atbasar aýdany
