Foto: zakon.kz
Turǵyndar óz qalaýlary boıynsha kórshi kóshelerdegi jaqyn týystarynyń úıine ornalasyp, qutqarýshylar eldiń qolyndaǵy irili-usaqty maldy qaýipsiz jerge aıdap shyǵarǵan.
552 adam turatyn Qaramyrza turǵyndaryna sý tasqynynan tónetin qaýip týraly aldyn ala habarlanǵan. Aýyl ákimdiginiń ǵımaratynda ashylǵan jedel shtab músheleri úıdi-úıdi aralap, turǵyndarǵa qandaı kómek kerek ekenin anyqtaý, qajet bolǵan jaǵdaıda psıhologııalyq kómek kórsetý sharalaryn qolǵa alyp jatyr. Qaýipti aımaqta quramynda 36 adam, 13 tehnıka, 3 qaıyq, 14 motosorǵy, 1 drony bar qutqarý qyzmeti, jergilikti atqarýshy organdar men polısııa kúshteri júr.
Búginde Qaramyrza, Zelenov, Jeleznodorojnyı, Oktıabrsk, Qarasý jáne Vostok aýyldary erekshe baqylaýǵa alynǵan. Qaramyrza aýylynda Tintýir ózenindegi sý deńgeıi men erigen qar sýyn kúni-túni qadaǵalap otyratyn eki baqylaý beketi qoıylǵan.
– Osydan eki kún buryn qardyń kúrt erýine baılanysty atyz-atyzdan jınalyp kelip quıylǵan qyzyl sýdyń saldarynan Tintýir ózeniniń deńgeıi 2 metr 30 santımetrge deıin kóterildi. Kemerinen asqan sý 6-7 saǵattyń ishinde Qaramyrza aýylyna jetti. Qazir bul aýyldaǵy 35 turǵyn úı, 60 aýla sý astynda qalyp otyr. Kórshiles Molodejnyı aýylynda da bir úıdi sý basyp ketti. Zardap shekkender joq, jaǵdaıdy baqylaýda ustap otyrmyz, – dedi oblystyq TJD-nyń qoǵammen baılanys tobynyń ókili Ýálıhan Dosanov.
Sý tasqynyna baılanysty Qarasý aýdanyna jumys saparymen barǵan oblys ákimi Qumar Aqsaqalov aýdan halqymen kezdesýinde tasqyn sýdan zardap shekken otbasylar úshin jańa turǵyn úıler salynatynyn aıtty.
– Sý tasqynynan zardap shekkenderge memleket materıaldyq kómek kórsetedi. Jergilikti aýyl sharýashylyǵy kásiporyndarynyń basshylary baspanasyn sý basqan turǵyndarǵa qaýipsiz jerden jańa úıler salyp berýge ýáde etip otyr. Kásipkerlerdiń turǵyn úı salýǵa jumsaǵan shyǵyndarynyń 50 paıyzyn memleket sýbsıdııalaıtyn bolady. Bıyl sý deńgeıi 2,5 metrge kóterildi, sondyqtan ınjenerlik qurylystardy jasaý múmkin emes. Jalǵyz durys sheshim – turǵyndardy qaýipsiz jerge kóshirý, – dedi ákim.
Tótenshe jaǵdaı departamentiniń sońǵy málimetinshe, Qaramyrza aýylyndaǵy tasqyn sýdyń beti qaıta bastaǵan. Mamandar Tintýir ózenindegi sý deńgeıi 1 metr tómendegenin aıtyp otyr. Nátıjesinde, 17 úıdiń aınalasyndaǵy sý keri qaıtqan. Qazirshe 18 úı, 60 aýla qyzyl sýdyń qursaýynda qalyp otyr. Evakýasııalanǵan 39 adamnyń 15-i óz úılerine qaıtyp oralǵan.
Qazir qutqarýshylar jyljymaly motosorǵylardyń kómegimen sý basqan turǵyn úılerdi qurǵatý jumystaryn júrgizip jatyr.
Qostanaı oblysy
