Memleket basshysy eki el arasyndaǵy yntymaqtastyqty nyǵaıtý úshin Ázerbaıjan Prezıdentiniń bul sapary erekshe mańyzǵa ıe ekenin atap ótti.
«Biz byltyr Strategııalyq qatynastardy nyǵaıtý jáne odaqtastyq yntymaqtastyqty tereńdetý týraly deklarasııaǵa, sondaı-aq Yntymaqtastyqty damytýdyń 2026 jylǵa deıingi keshendi baǵdarlamasyna qol qoıdyq. Búgin taǵy birqatar mańyzdy qujat qabyldanady. Sonymen qatar Sizdiń búgingi saparyńyz aıasynda yntymaqtastyǵymyzdyń saıası tuǵyrnamasyna tyń serpin beretin Joǵary memleketaralyq keńes quramyz. Bul ekijaqty qatynastarǵa tyń serpin beretini sózsiz», dedi Prezıdent.
Qasym-Jomart Toqaevtyń aıtýynsha, eki el arasyndaǵy taýar aınalymy 40 paıyzǵa artyp, jarty mıllıard dollarǵa jetti.
«Saýda-ekonomıkalyq yntymaqtastyǵymyzdyń aıtarlyqtaı ilgerilep kele jatqanyna kóńil tolatynyn aıtqym keledi. Búgin atap ótkenimizdeı, taýar aınalymy 40 paıyzǵa artyp, jarty mıllıard dollarǵa jetti. Bul úlken nátıje dep oılaımyn. Ekonomıkalyq áleýetimiz tolyq paıdalana otyryp, bul kórsetkishti 1 mıllıard dollarǵa deıin jetkizetinimizge senimdimin. Bul úshin bizde energetıka, kólik, logıstıka, IT, aýyl sharýashylyǵy, ónerkásip jáne taǵy basqa salalarda aıtarlyqtar rezervter bar», dedi Memleket basshysy.
Kelissózder barysynda qos eldiń mádenıet kúnderin ótkizý máselesi talqylandy.
«Eki eldiń mádenı onkúndigin ótkizý týraly ýaǵdalastyqty erekshe atap ótkim keledi. Bıyl Ázerbaıjanda Qazaqstannyń mádenıet kúnderi ótedi. Búgin biz qurmetti Ázerbaıjan Prezıdentimen birge kórnekti memleket qaıratkeri Geıdar Álıev atyndaǵy kósheni ashamyz. Bul ıgi shara ázerbaıjan halqynyń birtýar perzentiniń júz jyldyǵyna oraı ótkizilip otyr. Elderimizdiń shynaıy dostyǵy men ózara qoldaýynyń taǵy bir aıqyn dáleli – qazaq halqynyń Ázerbaıjanǵa tartýy Fızýlı qalasyndaǵy Qurmanǵazy atyndaǵy balalar shyǵarmashylyq ortalyǵy. Bul nysannyń qurylysy qarqyndy júrip jatqany jóninde maǵan málimdedi. Osy mańyzdy nysannyń iske qosylýyn jýyq arada kóre alamyz dep oılaımyn. Biz gýmanıtarlyq baılanystardy jan-jaqty damytyp, ortaq rýhanı jáne mádenı qundylyqtardy baıytýǵa nıettimiz», dedi Qasym-Jomart Toqaev.
Bul rette Ilham Álıev Qasym-Jomart Toqaevqa Qazaqstanǵa resmı saparmen shaqyrǵany úshin taǵy da alǵys aıtyp, qos eldiń halqy bir-birine baýyr retinde qaraıtynyn jetkizdi.
«Eń aldymen, Qazaqstanǵa resmı saparmen shaqyrǵanyńyz úshin taǵy da alǵys aıtamyn. Baýyrlas qazaq jerine kelgenime qýanyshtymyn. Bizdiń qarym-qatynasymyz nyǵaıyp keledi. Halyqtarymyzdyń arasyndaǵy baılanystyń tarıhy tereń ári biz árdaıym bir-birimizge baýyr retinde qaraımyz. Búgin osy berik irgetastyń negizinde keleshegimizdi birge quryp jatyrmyz. Biz buǵan deıin talqylaǵan yntymaqtastyqtyń barlyq salasynyń áleýeti mol», dedi Ázerbaıjan Prezıdenti.
Keńeıtilgen jıynda gýmanıtarlyq saladaǵy yntymaqtastyq máselesi keńinen talqylandy. Ilham Álıevtiń aıtýynsha, Qazaqstannyń Ázerbaıjandaǵy, sondaı-aq Ázerbaıjannyń Qazaqstandaǵy mádenıet kúnderiniń uıymdastyrylýy eki tarap arasyndaǵy qarym-qatynasty odan ári nyǵaıtýǵa septigin tıgizedi.
«Gýmanıtarlyq saladaǵy yntymaqtastyqtyń aıryqsha mańyzdy ekenin aıta ketkim keledi. Qazaqstannyń Ázerbaıjandaǵy, sondaı-aq Ázerbaıjannyń Qazaqstandaǵy mádenıet kúnderiniń uıymdastyrylýy elderimizdi odan ári jaqyndata túsip, halyqtarymyzdyń tereń tarıhy men baı mádenıetin pash etedi. Bizdiń oıymyzsha, memleketaralyq qarym-qatynasymyzdyń negizi – osy gýmanıtarlyq sala. Árıne, eki taraptyń da múddesine saı salalar az emes. Biz, shyn máninde, ózara yntymaqtastyq pen odaqtastyqtyń jańa deńgeıine kóterilip jatyrmyz», dep túıindedi Ázerbaıjan Prezıdenti Ilham Álıev.
