«BAQ pen áleýmettik jelilerdiń memlekettik ıdeologııany qalyptastyrýdaǵy orny» degen taqyrypta ótken basqosýǵa Áleýmettik-mádenıdamý jáne ǵylym komıtetiniń tóraǵasy Nurtóre Júsip, komıtet músheleri Talǵat Júnisov, Lázzat Qaltaeva, Aıgúl Qapbarova, Rýslan Rústemov, Aqparat jáne qoǵamdyq damý vıse-mınıstri Qanat Ysqaqov, Aqparat komıtetiniń tóraǵa orynbasary Nurlybek Jeńisbekuly jáne «Qazaq gazetteri» JShS bas dırektory Dıhan Qamzabekuly bastaǵan «Egemen Qazaqstan» men «Kazahstanskaıa pravda» gazetteriniń shyǵarmashylyq ujymy qatysty.
Senat depýtattary áýeli «Egemen Qazaqstan»gazetiniń jumysymen tanysyp, redaksııany aralap kórdi. Basqosý barysynda buqaralyq aqparat quraldarynyń qazirgi jaǵdaıy, BAQ pen áleýmettik jelilerdiń memlekettik ıdeologııany nasıhattaýdaǵy róli jaıly pikirlesti.
Seriktestik basshysy Dıhan Qamzabekuly qaıta qurylymdalǵan seriktestiktiń qazirgi baǵyt-baǵdary, basylymdardyń ahýaly jaıly áńgimeledi.
«Mysaly, shet memleketterde, onyń ishinde Japonııa, Ulybrıtanııa, Germanııada dástúrli basylymǵa jazylý 58 paıyzdy quraıdy. Al, elimizde ekonomıkalyq qıyndyqtarǵa, pandemııaǵa baılanysty basylymdarǵa jazylý tómendep ketti. Áleýmettanýshylardyń zertteýine sáıkes, qazir gazettiń kúndelikti oqyrmany 13 paıyzdy ǵana qurap otyr. Al sırek oqıtyndar - 43 paıyz, múlde oqymaıtyndar - 23 paıyzdy qurady», dedi D.Qamzabekuly. 
Sondaı-aq kezdesý barysynda jýrnalısterdiń áleýmettik jaǵdaıyn jaqsartý, jalaqy men qalamaqy kólemin arttyrý máselesi de aıtyldy.
«Gazet – oı tastar, qoǵamdyq sana qalǵyp ketpes úshin jumys isteıtin birden-bir qural. Biraq naryqqa, jarnamaǵa baılanysty kóp máseleler bar. Mysaly, qaǵaz baǵasynyń qymbat bolýy. Bul máseleni memleketaralyq úlken jıyndarda qarastyrý qajet», dedi Nurtóre Júsip.
Kezdesý sońynda depýtattar taıaýda aqparat quraldarynyń túıindi máselelerin Parlamentte talqylaıtynyn, oǵan mindetti túrde gazet-jýrnaldar qyzmetkerleri shaqyrylatynyn, búgingi kezdesýde aıtylǵan ózekti máselelerge nazar aýdarylatynyn aıtty.
