Degenmen, kadrlyq tapshylyqtan arylýdyń joly da, jóni de tabylyp, olqylyqtyń orny tola bastaǵany qýantady. Prezıdent janyndaǵy Memlekettik basqarý akademııasynyń Abaı oblysyndaǵy fılıalynyń ashylýy – sonyń aıqyn dáleli. Semeı polıtehnıkalyq kolledjiniń ǵımaratynda ornalasqan akademııa fılıalynyń ashylýyna qatysqan Abaı oblysy ákiminiń orynbasary Shalqar Baıbekov bul bastamanyń kadr máselesin sheshýdegi mańyzdy qadam ekendigin atap ótti.
– О́ıtkeni oblystaǵy kóptegen memlekettik qyzmetshiler, negizinen bul salaǵa endi ǵana kelgen jas mamandar. Akademııada olarǵa bilimin keńeıtip, daǵdylaryn damytý úshin úlken múmkindikter bar. Munda departamentter men basqarmalardyń mamandary daıyndalady. Qazir munda 68 memlekettik qyzmetker bilim alyp jatyr. Olardyń barlyǵy qyzmettegi mamandar. Birden 17 túrli vedomstvonyń qyzmetkerlerin tabý múmkin emes. Sondyqtan kadr máselesin sheshýge jete mán berip otyrmyz, – deıdi Shalqar Baıbekov.
Jalpy, jańa oblystyń damýyna jaýapkershilikpen qaraý memlekettik qyzmettegi sapaly kadrlardy shyńdaýǵa da baılanysty ekeni túsinikti. Memlekettik qyzmet isteri agenttiginiń oblys boıynsha departamentiniń basshysy Ádilbek Muqashevtyń aıtýynsha, oblysta 3,5 myńǵa jýyq memlekettik qyzmetker jumys isteıdi. Fılıaldyń ashylýy olardyń biliktiligin arttyrýǵa, qaıta daıarlyqtan ótýine de jol ashady.
Oblys qurylǵanǵa deıin semeılik memlekettik qyzmetshiler bilim men biligin arttyrý úshin О́skemen qalasyna shapqylaıtyn. Endi ol kúnder artta qaldy. Budan bylaı aýdan ákimdikterinde, basqarmalar men bólimderde qyzmet atqaryp júrgen mamandar oblys ortalyǵy mártebesin alǵan Semeı qalasyna kelip, Memlekettik basqarý akademııasynyń fılıalynda bilimin jetildire alady.
Abaı oblysy
