Qasym-Jomart Toqaev otyrys barysynda ózin alańdatqan birneshe máselege toqtalyp ótti.
«Álem qaýymdastyǵy birlesip sheshimin tabýǵa tıis asa kúrdeli máseleler bar. Jahandyq jylyný úderisin báseńdetý, azyq-túlik qaýipsizdigin saqtaý jáne indettiń saldaryn joıý aıryqsha mańyzdy. Bir sózben aıtsaq, zaman óte jyldam ózgerip jatyr. Biz osy ózgeriske beıimdelýimiz kerek. Áıtpese, órkenıet dańǵylynan qalyp qoıýymyz múmkin», dedi Prezıdent.
Memleket basshysynyń aıtýynsha, Qazaqstan halqynyń ortaq maqsaty – kóshke ilesetin emes, sol kóshti bastaıtyn elderdiń qatarynda bolý.
«Bul maqsat, árıne, óte kúrdeli, ony jaqsy túsinýimiz kerek. Men bul týraly únemi aıtyp júrmin. Iаǵnı, ǵylymı damýdyń sońynda qalmaı, osy progresti anyqtaıtyn memleketterdiń qatarynda bolý – negizgi mindet. Bálkim, bul mindet tym kúrdeli kóriner. Biraq biz aldymyzǵa osyndaı maqsat qoıýymyz kerek. Oǵan elimizdiń ǵylymı áleýeti jetedi. Bul mindettiń ońaı emes ekenin túsinemin. Alaıda biz ony sózsiz oryndaýǵa tyrysýymyz qajet. Jalpy, biz aldymyzǵa qol jetkize almaıtyn tym asqaq maqsattar qoımaýymyz kerek, biraq ǵylymı jetistikterge jetý úshin bar kúsh-jigerimizdi salýymyz qajet», dedi Memleket basshysy.
