Ǵylym-bilim-óndiris arasynda baılanys arttyrý, ǵylymdy bıznes arqyly damytýdy maqsat etken aýqymdy sharaǵa Ǵylym jáne joǵary bilim mınıstri Saıasat Nurbek, Ál-Farabı atyndaǵy QazUÝ-dyń basqarma tóraǵasy-rektor Janseıit Túımebaev, Almaty qalasy ákiminiń orynbasary Álisher Ábdiqadyrov, «Atameken» ulttyq kásipkerler palatasy basqarma tóraǵasynyń birinshi orynbasary Maqsat Qıqymov jáne iri kompanııalar ókilderi, ǵalymdar qatysty.
Kórmede Ál-Farabı atyndaǵy QazUÝ, L.N.Gýmılev atyndaǵy EUÝ, Q.Sátbaev atyndaǵy QazUTÝ, S.Asfendııarov atyndaǵy QazUMÝ, M.Áýezov atyndaǵy OQMÝ, Almaty tehnologııalyq ýnıversıteti, M.Aıthojın atyndaǵy Molekýlıarlyq bıologııa jáne bıohımııa ınstıtýty, Iаdrolyq fızıka ınstıtýty jáne ózge de JOO men ǵylymı ınstıtýt ǵalymdary óz jobalaryn bolashaq bıznes-áriptester nazaryna usynýǵa múmkindik aldy.
Ál-Farabı atyndaǵy QazUÝ-dyń bıologııa fakýltetiniń ǵalymdary mıkrobaldyrlar negizindegi bıologııalyq belsendi qospalar jobasyn usyndy. Joba jetekshisi, professor Bolathan Zaıadan jobanyń basty jańalyǵy kóptegen salaǵa qajetti qaýipsiz bıopreparattar daıyndaý ekenin alǵa tartty.
Ǵalymnyń aıtýynsha, fototrofty mıkroorganızmder tobyna kiretin mıkrobaldyrlar men sıanobakterııalar – kóptegen qundy bıologııalyq belsendi qosylystardyń kózi. Sondaı-aq agrarlyq, medısınalyq, kosmetıkalyq jáne taǵam ónerkásibinde qaýipsiz bıopreparattar alýǵa úlken qyzyǵýshylyq týdyrady.
Sonymen qatar, QazUÝ-dyń jas ǵalymy Asan Ábdirahym qyzmetkerlerdiń sharshaýyn boldyrmaýǵa arnalǵan «GoDays» startapy jaıly aıtty. Analıtıkalyq qural jasandy ıntellektige negizdelgen.
«Joba emosıonaldyq sharshaýdyń aldyn alýǵa jáne jumys júktemesi men kestesin qyzmetkerdiń eń tıimdi jumys ýaqytyna sáıkes retteýge kómektesedi», deıdi izdenýshi.
Kórmeden soń ǵylym men bıznestiń tabysty áriptestigi máselelerine arnalǵan plenarlyq otyrys ótti. Sonymen qatar, jıyn aıasynda «Qazirgi jaǵdaıdaǵy ǵylym men bıznes ıntegrasııasy» taqyrybyndaǵy dóńgelek ústel uıymdastyryldy.
