Burymdylar arasyndaǵy básekeniń ekinshi kúni Altyn Shaǵaeva (53 kılo) men Irına Kýznesova (62 kılo) alǵashqy kezeńderde súrindi. Altyn taıpeılik Meng Hsýan Hsıennen jeńilse, Irına qytaılyq Hıajýan Lýonyń osal tusyn taba almady. Bul sportshynyń ekeýi de sary qurlyqtyń basty dodasyna nashar babynda kelgenderi birden baıqaldy. Olardyń boıynan jeńiske degen erik-jiger men erekshe qulshynysty baıqaı almadyq. Sonyń saldarynan Shaǵaeva men Kýznesova qalyń toptyń arasynda qalyp qoıdy.
Eki jerlesimiz qola medal úshin talasty. 57 kılo salmaqtaǵy Nýlýfar Raımova tusaýkeser kezdesýinde Taıpeı ókili Iýý Han Chengti shań qaptyrǵanymen, ile-shala ózbekstandyq Láılıahon Sobırovaǵa jol berdi. Al úshinshi oryn úshin saıysta qyrǵyzstandyq Bermet Nurıdınqyzyn qapy qaldyrdy. Sóıtip, byltyr Reseıdiń О́fe qalasynda ótken jastar arasyndaǵy álem birinshiliginde altynnan alqa taqqan 21 jastaǵy daryndy balýan áıelder dodasyndaǵy óziniń tyrnaqaldy tabysyna qol jetkizdi.
Kóp keshikpeı 65 kılodaǵy Álbına Qaıyrgeldınova Manısha Manıshamen beldesti. Byltyr dál osy Úndistannyń myqtysy Almatyda ótken Bolat Turlyhanovtyń reıtıngtik týrnırinde bas júldeni oljalaǵan edi. Sol kezde onyń ónerine barsha jurt tamsandy. Bıyl da úndi qyzy babynda eken. Bul básekede Manıshanyń sheberlik deńgeıi qandasymyzdan áldeqaıda joǵary ekeni anyq ańǵaryldy. Álbınany ol birinshi kezeńde-aq eńserdi.
Eń sońynda 72 kılo salmaq dárejesinde beldesken balýandar túrli-tústi júldelerdi sarapqa saldy. Bozkilemge Jámıla Baqbergenova shyqqan saıyn kórermender aıǵaıǵa basyp, barynsha qoldaý kórsetti. Qazaqtyń qyzyna ondaı qurmettiń kórsetilýi tegin emes-ti. Almaty oblysyndaǵy Jambyl aýdanynyń týmasyn tarıhta qalatyndaı talaı is tyndyrdy. Ol sońǵy eki álem chempıonatynda kúmis medaldi moınynda jarqyratty. Jámılaǵa deıin osy sport túrin serik etken eshbir qyzymyz ondaı nátıjege qol jetkize alǵan joq edi.
Elorda tórinde Taıpeı men Mońǵolııanyń sportshylaryn eńserý Baqbergenova úshin aıtarlyqtaı qıyndyq týǵyzǵan joq. Fınalda ol japonııalyq Sýmıre Nııkýramen kúsh synasty. Byltyr Ulanbatyrda ótken Azııa chempıonatynyń fınalynda ekeýiniń joly qıysqan edi. Ol kezde Jámıla jeńiske jetti. Bul joly da dál solaı boldy. Japon balýany «qarymta qaıtaramyn» dep qansha jantalasqanymen, jerlesimiz oǵan adym ashtyrmady. Ol onyń ár shabýylynyń betin qaıtaryp otyrdy. Ońtaıly sátte ózi de táýekelge baryp, upaılaryn eseleı tústi. Nátıjesinde, bul tartys Jámılanyń jeńisimen aıaqtalyp, ol úsh dúrkin Azııa chempıony degen mártebeli ataqty ıelendi. Odan bólek, Baqbergenovanyń atalǵan jarysta jeńip alǵan bir kúmis pen bir qola medali bar.
Jalpykomandalyq esepte Qazaqstannyń áıelder quramasy úshinshi orynǵa taban tiredi. Bul jarysta Jámıla Baqbergenova (72 kılo) men Elmıra Syzdyqova (76 kılo) altynnan alqa taqsa, Marına Sedneva (55 kılo), Nýlýfar Raımova (57 kılo) jáne Elena Shalygına (68 kılo) qola medal enshiledi. Al birinshi orynda – Japonııa quramasy. Kúnshyǵys eliniń balýan qyzdary 5 altyn, 2 kúmis jáne 2 qolany oljalady. Qorjynynda 2 altyn, 1 kúmis jáne 3 qolasy bar Qytaı sportshylary ekinshi satyǵa jaıǵasty. Túrli-tústi medalderdi bir-birden ıemdengen Qyrǵyzstannyń burymdylary tórtinshi orynǵa turaqtady. Sondaı-aq Úndistan (2 kúmis, 5 qola), Mońǵolııa (2 kúmis, 2 qola), О́zbekstan (2 kúmis, 1 qola) jáne Ońtústik Koreıa (1 qola) balýandaryna júlde alý baqyty buıyrdy.
