Baıaǵyda, myna Qarakesekte bir Kúshikbaı degen baı bolypty. Zamanynda, Atymtaı jomart sııaqty qolynyń ashyqtyǵymen, myrzalyǵymen aty shyqqan adam eken, – Sabyt uıyǵan aıaǵyn sozyp sál otyrdy, — Talaı adamdy tizginge jetkizipti. Talaıdyń basyna úı tigip, aldyna mal, qazanyna as salyp beripti. Sóıtken Kúshikbaıdyń jalǵyz uly óledi ǵoı. Sonda Kúshikbaı nalyǵan deıdi. Bul Qudaıǵa ne jazdym, qarip pen qaserge mendeı sharapat qylǵan adam bar ma edi. Qaı qylyǵymnan taptym. Qoı, Qudaıda ádilet joq eken. Odan da óleıin depti. Aýyldyń adamdary ý iship ólmesin dep, ýdyń bárin tyǵyp tastapty. Baýyzdalyp ólmek bolypty. Týystary temir bitkenniń bárin tyǵyp tastapty. Endi ashtan ólem dep teris qarap jatty deıdi. Janyna qazy-qarta, jal-jaıa qoıady. Birine qaramapty.
Aqyrynda baı-ekeń sarǵaıyp, shynynda da ólim aýzyna barǵan deıdi. Endi ne isteımiz dep jurt sasady. Aqyrynda jón biletin bireý, baı-ekeńdi bir seıiltse, Táttimbet seıiltedi deıdi. Sonymen Táttimbetti qos attap aldyrady. Táttimbet, qylshyldaǵan jas kezi eken, tabaldyryqqa otyra sala dombyrasyn shertken deıdi. Eki kún otyryp qansha kúı tolǵaǵan. Jıyny alpys eki kúı bolypty. Aqyrynda Kúshikbaı, kóziniń jasy bulaqtyń sýyndaı bolyp aǵyp, qaıǵy-sheri tarqap ornynan turypty.
Bul ózi uzaq kúı. Áldeneshe taraý. «Tabaldyryq Qosbasar», «Zar Qosbasar», «Jaısary Qosbasar»bolyp salalanyp kete beredi. Arqada osy alpys eki kúıdi buzbaı tolyq tartqan sheberler bolypty. Al myna estigenderiń, sol kúıdiń sońǵysy — «Qyrmyzy Qosbasar», — Sabyt aıaǵyn jıyp qaıtadan maldas qura otyrdy.
Talasbek Ásemqulov «Taltús» romanynan
Derekkóz – Kúı ańyzy
