Úsh kúnge sozylǵan ǵajaıyp óner dodasy jetisýlyqtardy ǵana emes, elimizdiń túkpir-túkpirinen jınalǵan teatr janashyrlaryna da úlken rýhanı azyq boldy. Bekzada bolmysymen, tunyq tabıǵatymen, kóregendigi hám aqkókirek adaldyǵymen, erekshe darynymen el mahabbatyna kenelip, jurt sharapatyna bólengen Bıapa jaıly aıtar sóz kóp. Estelikter de túgesiler emes.
Atalǵan óner báıgesinde bekzat ónerdiń oshaǵyn úrlep, jalynyn mazdatyp júrgen Jetisý oblysyndaǵy «halyqtyq» ataǵy bar teatrlar men tusaýy jańa kesilgen jas óner ujymdary synǵa tústi. Ulaǵatty tulǵanyń umytýǵa bolmaıtyn ómir soqpaǵyn, ónerde somdap ketken áz beınesin, «Bıapa» dep qadir tutqan qazaq kórermenderiniń mahabbaty men óner ujymdarynyń daýylpazǵa degen qurmetin festıval barysynda aıqyn ańǵardyq.
Oblystyq mádenıet, arhıvter jáne qujattama basqarmasy men oblystyq halyq shyǵarmashylyǵy ortalyǵynyń uıymdastyrýymen dúbirlegen dodada aımaqtaǵy 13 teatr óner jarystyrdy, úzeńgi qaǵystyrdy. Elimizge tanymal kınoakterleri, B.Rımova atyndaǵy Taldyqorǵan drama teatrynyń maıtalmandary Serik Nurhalyq, Kendebaı Temirbaev, Saǵyndyq Jumádil, Ǵalııa Temirbaeva jáne oblystyq mádenıet, arhıvter jáne qujattama basqarmasynyń bólim basshysy Gúlmıra Qalqabaeva qazylyq etken alaman joǵary deńgeıde órbidi.
Oblystyq fılarmonııa ǵımaratynda ótken marapattaý saltanatynda alǵashqy bolyp sóz alǵan oblystyq mádenıet, arhıvter jáne qujattama basqarmasy basshysynyń mindetin atqarýshy Gúlim Ábseıitova halqymyzdyń mańdaıyna bitken asyl apamyzdyń tarıhtaǵy tuǵyryn, aıshyqty izin atap, saralap ótti. О́z kezeginde daýylpazyn dáripteý óneri ozǵan eldiń ǵana qolynan keler is dep tolǵandy.
О́ner básekesinde, talant tartysynda synalǵan teatr ujymdaryn jáne jekeleı shyǵarmashylyq adamdaryn marapattaý saltanatynda alǵashqy bolyp atalymdar boıynsha syılyq usynyldy. Atap aıtsaq, «Úzdik jas akter» atalymyn taldyqorǵandyq M.Maqataev atyndaǵy poetıkalyq «Jas akter» teatrynyń ónerpazy Álibek Danabek, «Úzdik ssenograf» atalymyn taldyqorǵandyq Araılym Qalmuhambetova, «Úzdik rejıssýra» atalymyn belgili rejısser Ulan Ahmetov ıelendi. Sonymen qatar «Úzdik er adam beınesi» atalymyn «Jas ulan» jastar teatrynyń akteri Bekjan Kárimov, «Úzdik áıel adam beınesi» atalymyn Sarqan aýdandyq ónerpazdar teatrynyń aktrısasy Gaýhar Turalıeva enshiledi. Atalǵan azamattar 80 myń teńgeniń sertıfıkatyn qanjyǵalady.
О́zderiniń áserli qoıylymy arqyly kórermenniń kóńil tórinen oryn alǵan birqatar teatr yntalandyrý syılyǵymen jáne 100 myń teńgelik sertıfıkatpen marapattaldy. Atap aıtsaq, M.Maqataev atyndaǵy poetıkalyq «Jas akter», Qaratal teatrlary men halyqtyq ataǵy bar Aqsý, Úsharal, «Qýyrshaq» teatrlary yntalandy. Al jarystyń 3-shi tuǵyrynan jarkenttik Dánesh Raqyshev atyndaǵy halyq teatry men taldyqorǵandyq «Jas Ulan» jastar teatry kórinip, 250 myń teńgeni enshiledi. О́z kezeginde kóksýlyq Muqyry halyq teatry men Sarqan aýdandyq ónerpazdar teatry II oryn ıegeri dep tanylyp, 300 myń teńgege ıe boldy.
Halyq ertegisi «Qańbaq shaldy» sahnalap kórermenniń yqylasyna bólengen «Smile Aksu» qýyrshaq teatry men S.Júnisovtiń «Jaraly gúlder» dramasy arqyly jetisýlyqtardy tánti etken Kúreńbel teatry I orynnan kórindi. Alǵashqy tuǵyrdan qatar kelgen qos teatrǵa 400 myń teńgeniń sertıfıkaty tabys etildi.
«Júzden júırik, myńnan tulpar» degendeı, kere qarys mańdaıyn kerme jibine aldymen tıgizgen «Jetisý mýzykalyq jastar teatry» Aleksandr Volodınnyń «Kezdesý men qoshtasý. S lıýbımymı ne rasstavaıtes» dramasyn sahnalap, bas báıgeni enshilep, 500 myń teńgeni qanjyǵaǵa bókterdi.
Marapattaý saltanatynda sóz alǵan qazylar alqasynyń tóraǵasy, teatr jáne kınoakteri Serik Nurhalyq:
«О́ner – elge ortaq qazyna, jalpyulttyq qundylyq. Búgingi kúni ótkenine salaýat aıtyp, alyptaryn ardaqtap jatqan elden baqytty memleket bolmas dep oılaımyz. Qazaq aspanynda ónerdiń shyraǵyn jaǵyp, teatrdyń qasıetti sahnasyna sanaly ǵumyryn arnaǵan, kıno óneri arqyly el anasynyń keıpin somdaǵan Bıapanyń qurmetine osylaı báıge arnaýdyń ózi zor mártebe. Osyndaı alamandy jasaǵan oblystyq mádenıet basqarmasy men halyq shyǵarmashylyq ortalyǵyna óner adamdarynyń, halyqtyń atynan alǵys aıtqym keledi», dep tebirendi.
Saltanatty jıyn sońynda kópshilik kórermen I. Jansúgirov atyndaǵy Jetisý ýnıversıteti janynan qurylǵan «Jetisý mýzykalyq jastar teatrynyń» úsh kúndik alaman báıgesin enshilegen qoıylymyn tamashalady.
Jetisý oblysy
