О́tken demalys kúnderi Almatynyń Medeý aýdanynda ornalasqan túngi klýbtardyń birinde polısııanyń arnaıy jasaǵy men EQqKB-nyń jedel qyzmetkerleri arnaıy is-shara júrgizdi. Ony qalalyq Prokýratýra «Esirtki bıznesimen kúres» jobasy aıasynda úılestirdi.
«Túngi saǵat 2-de túngi klýbta 19 jastaǵy T. esimdi azamat ustaldy, onyń shalbarynyń oń qaltasynan kók ızolentaǵa oralǵan, sıntetıkalyq zat salynǵan úsh býma tabyldy. Jumys nusqalarynyń birine sáıkes, bul mefedron psıhoaktıvti zaty. Esirtkiniń naqty tıesiligin anyqtaý úshin sot-hımııalyq saraptama taǵaıyndaldy. Ustalǵan azamat QR QPK-niń 128-babyna sáıkes ýaqytsha ustaý ızolıatoryna qamaldy. Sotqa deıingi tergeý QR QK-niń 297-baby 1-bóligi boıynsha júrgizilip jatyr», dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
QR QPK-niń 201-babyna sáıkes tergeý múddesin kózdeıtin ózge de málimetter jarııa etýge jatpaıdy.
