– Ulttyq ýnıversıtettiń tarıhy tereńde jatyr. Oqý ordasy alǵash akademııalyq qalashyq modelimen salynǵan bolatyn. 1974-1975 jyldardan keıin ýnıversıtetke keń kólemde ınvestısııa quıylmaǵan. Sondyqtan bul jolǵy qadamnyń mańyzy óte joǵary. Josparǵa Memleket basshysynyń ózi qoldaý bildirip otyr. Qara shańyraqtyń ekinshi tynysy ashyldy deýge bolady, – dedi estelik kapsýlany ornatý is-sharasyna qatysqan Ǵylym jáne joǵary bilim mınıstri Saıasat Nurbek.
Almaty qalasy ákiminiń orynbasary Álisher Ábdiqadyrov jańa jataqhanalardyń salynýy jastar úshin aıtýly is-shara ekenin atap ótti. Al ýnıversıtet rektory Janseıit Túımebaev qurylystyń ekinshi kezeńin júzege asyrý stýdentter úshin zamanaýı múmkindikter syılaıtynyn aıtty.
– Ulttyq ýnıversıtet elimizdegi irgeli, kóshbasshy oqý orny retinde tanymal. Memleket basshysy bul jospardy ótken jyly ýnıversıtetimizge jumys saparymen kelgende kórip, barlyq bastamamyzǵa qoldaý kórsetti. Elimiz ben shetel jastarynyń kóbi zamanǵa saı bilim alý úshin Qazaq ulttyq ýnıversıtetin tańdaıdy. Búginde oqý ordasynda 24 myńnan astam stýdent bilim alyp jatyr. Onyń ishinde 50-ge jýyq memleketten kelgen 3 myńnan astam sheteldik stýdent bar. Ýnıversıtet «QS WUR» álemdik reıtınginde 150-orynǵa kóterildi, – dedi J.Túımebaev.
Aıtýly is-shara barysynda keleshek urpaq úshin jazylǵan hat arnaıy kapsýlaǵa salyndy.
Ýnıversıtettiń baspasóz qyzmeti habarlaǵandaı, aldaǵy josparda qalashyqta 14 700 oryndyq oqý ǵımarattary, 12 myń sharshy metr ákimshilik korpýstary, 35 myń sharshy metr emhana, 3 myń sharshy metr sporttyq-saýyqtyrý ortalyǵy, qyzmetkerlerge arnalǵan turǵyn úı, ınnovasııalyq ortalyq, ǵylymı-zertteý ortalyǵy, tehnopark jáne stýdentter men magıstranttarǵa, doktoranttarǵa úsh gektar jerge 12 myń oryndyq jataqhanalar boı kóteretin bolady. Sondaı-aq qoldanystaǵy jataqhanalar, oqý korpýstary men ákimshilik ǵımarattar kúrdeli jóndeýden ótedi.
ALMATY
