Dıalog alanynda bıznes ókilderine ǵalymdardyń tyń 11 ǵylymı jobasy usynyldy. Onyń ishinde munaı salasynan týrızmge deıingi jobalar bar. Sondaı-aq aýyl sharýashylyǵy salasy men tamaq ónerkásibine qatysty ǵylymı ázirlemeler de tanystyryldy. Is-sharany ótkizýge muryndyq bolǵan «Ǵylym qorynyń» ınvestısııa jáne jańa jobalar departamentiniń basshysy Qurmanǵazy Omarov elimizde ǵylym men bıznes arasyndaǵy yqpaldastyq tómen ekenin alǵa tartty.
– Bizdiń qor ǵylym men bıznes arasyndaǵy yqpaldastyqty arttyrý maqsatynda byltyrdan beri birqatar is-shara uıymdastyrdy. Máselen, ótken jyly dál osyndaı tórt dıalog alańyn ótkizdik. Nátıjesi jaman emes. Mysaly, tehnologııalardy kommersııalandyrý reaktorynda 30-dan asa joba usynylsa, sonyń ishinen birqatar ǵylymı jobany ázirlegen ýnıversıtetter men kásipkerler arasynda kelisimshart jasaldy. Bul jobalar óndiriske «Ǵylym qory» tarapynan bólingen grant nemese bıznes ókilderiniń qarajaty esebinen engiziledi. Bıyl ekinshi ret ótkizip otyrǵan is-sharany Ǵylym qyzmetkerleri kúnine arnadyq. Búginde tehnologııalardy kommersııalandyrý reaktoryna bıznes ókilderi tarapynan qyzyǵýshylyq joǵary. Ár kezdesýimizge qatysý úshin kásipkerlerden ótinishter kóp túsedi, – dedi Qurmanǵazy Omarov.
Departament basshysy aldaǵy ýaqytta «Ǵylym qory» bul is-sharany elimizdiń barlyq aımaǵynda ótkizýdi josparlap otyrǵanyn jetkizdi. Atalǵan baǵyt boıynsha osy jyldyń 6 maýsymynda S.Asfendııarov atyndaǵy Qazaq ulttyq medısınalyq ýnıversıtetiniń forýmy aıasynda oqý baǵdary boıynsha salalyq tehnologııalardy kommersııalandyrý reaktoryn uıymdastyrýǵa usynys kelip túsken.
Dıalog alańynda árbir ǵalym bıznes ókilderine 3 mınýt ishinde jobalary týraly aıtyp berdi. Máselen, H.Dosmuhamedov atyndaǵy Atyraý ýnıversıtetindegi «Bıotehnologııa» ulttyq ǵylymı ortalyǵynyń dırektory, professor Sofııa Saǵyndyqova túıe sútinen jasalǵan «SofMaııa» sýsyny týraly baıandady.
– Bul sýsyndy ǵylymı jetekshim ekeýmiz birlesip jasadyq. Sondyqtan onyń atyn «SofMaııa» dep atadyq. Endigi maqsatymyz – osy sýsyndy óndiriske engizý. Sondyqtan bıznes seriktes izdep júrmiz. Bul ónim qalaı paıda boldy, sony aıtaıyn. Anam qant dıabetimen aýyrdy. Soǵan túıe shubatynyń kómegi kóp tıdi. Shubatty daıyn ınsýlın dep aıtýǵa bolady. Biraq túıe súti adamnyń ishin qatyrady. Muny boldyrmas úshin qyzylsha shyrynyn paıdalaný kerek. Qyzylsha, kerisinshe ishti jibitedi. Al ekeýi birikkende jaqsy effekt beredi. Qysqasy, bul sýsynnyń qasıeti mol, – dedi Sofııa Saǵyndyqova.
Sondaı-aq «Ǵylym qory» dıalog alańynda vırtýaldy týr uıymdastyrdy. Sol arqyly kez-kelgen qatysýshyǵa ózin qyzyqtyrǵan jobamen tanysýǵa múmkindik týdy. Is-sharaǵa 100-ge jýyq ǵylym men bıznes ókili qatysty. Arasynda halyqaralyq uıymdar men kompanııalardyń ókilderi de bar. Osy rette Ǵylym jáne joǵary bilim mınıstriniń sheshimimen «Ǵylym qoryna» ulttyq úılestirý ortalyǵy mártebesi berilgenin aıta keteıik.
Dıalog alańynyń qorytyndysy boıynsha ǵylymı uıymdar men bıznes ókilderi arasynda 6 jobany júzege asyrý týraly ýaǵdalastyqqa qol jetkizildi.
