Baıqaýǵa Almaty qalasynyń memlekettik bilim berý uıymdaryndaǵy negizgi pánderden 1-11-synyptarǵa sabaq beretin 36 jasqa deıingi muǵalimder qatysa alady. Konkýrs barysynda muǵalimder óz tájirıbeleri jáne pedagogıkalyq tujyrymdarymen bólisip, jetistikterin kórsete alady. Bıylǵy baıqaýdyń bas júlde qory 5 mln teńge. Sonymen qatar bes jeńimpaz Fınlıandııanyń Helsınkı qalasynda taǵylymdamadan ótip, bilim berýdiń tyń ádisterin ıgerýmen qatar, tájirıbe almasyp, ozyq mektepter jumysymen tanysyp qaıtady.
«Meniń bilim berý fılosofııam» taqyrybynda mýltımedııalyq maqala ázirleý, «Muǵalim – kásibı maman» baıqaý sabaǵyn ótkizý, «Men – muǵalim-kóshbasshymyn» taqyrybynda avtorlyq sheberlik sabaqtaryn ótkizý (óziniń pedagogıkalyq tájirıbesi jáne kásibı sheberligimen tanystyrý) sııaqty úsh kezeńnen turatyn baıqaýǵa qatysýshylar almatyustazy-2023.kz platformasynda osy jyldyń 14 sáýirine deıin tirkeldi. Al 17-26 sáýir aralyǵynda materıaldar saraptama komıssııasynyń irikteýinen ótedi.
«Byltyr bastaýysh synyp muǵalimderi baıqaýda belsendilik tanytty. Baıqaý qalanyń memlekettik jalpy bilim beretin mektepteriniń deńgeıin arttyrýdy kózdeıdi. Almaty ozyq bilim berý tehnologııalarynyń ortalyǵy retinde damı otyryp, qazirgi bilim berý júıesindegi zamanaýı oqytý ádisterine basymdyq berip keledi. Osy oraıda jas muǵalimder baıqaýǵa qatysa otyryp, kásibı turǵyda ósýin qamtamasyz etip, sıfrlyq dáýir jaǵdaıynda jumystyń jańa tásilderin ıgerýge qadam jasaıtyn bolady», dedi Almaty qalalyq bilim basqarmasynyń basshysy Lázzat Jylqybaeva.
Baıqaý osy jyldyń qazan aıynda aıaqtalady.
