Jýyrda óńirdegi áleýmettik qorǵaý jáne halyqty jumyspen qamtý salasyndaǵy sybaılas jemqorlyq táýekelderine syrtqy taldaý qorytyndylary jarııa etildi. Oblystyq sybaılas jemqorlyqqa qarsy is-qımyl departamentiniń basshysy Darhan Quraqbaev atap ótkendeı, tirkelgen zań buzýshylyqtardyń sany 30-dan asqan. Olardyń qatarynda bıznesti damytýǵa baǵyttalǵan memlekettik granttardy úlestirýge qatysty jobalar da bar. Qazynadan bólingen grant qarajattaryn úlestirýde jobany júzege asyrýshylar «barmaq basty, kóz qysty» áreketterge barǵan. Grant qarajattaryn úshinshi tulǵaǵa aýdarý, jobaǵa qatysýshyǵa granttyń eki ret berilýi, sondaı-aq turaqty eńbek orny bar azamatqa rásimdelýi sııaqty zań buzýshylyqtar tirkeldi. Mundaı kemshilikke jol bergen bes adam tártiptik jazaǵa tartylsa, taǵy ekeýi laýazymynan bosatyldy. Taǵy 20 zań buzýshylyq áleýmettik jumys oryndary men qoǵamdyq jumys oryndaryn qurýǵa qatysty eken. Onyń 14-i boıynsha jemqorlyq áreketteri dáleldenip, jumyspen qamtý ortalyqtarynyń segiz qyzmetkeri jazalansa, tórt adam jumystan qýyldy.
«Ekibastuzda óreskel zań buzýshylyqty tirkedik. Áldebir er azamat jumyspen qamtý ortalyǵy arqyly jergilikti sharýa qojalyǵyna jumysqa tirkelip qoıypty. Alaıda jumys ýaqytynda naqty túrde ol jerde bolmaǵan, tipti el aýmaǵynan tys jerde turyp jatqan. Sáıkesinshe ol adamnyń fermada jumys isteý múmkindigi joq edi. Al memleketten aı saıyn áleýmettik jumys orny úshin tıisti qarajat qojalyqqa aýdarylyp kelgen. Tekserý is-sharalarynyń nátıjesinde jumys berýshi zańsyz ıelengen 420 myń teńgeni qazynaǵa qaıtardy», deıdi D.Quraqbaev.
Budan bólek, Pavlodar men Ekibastuz qalalarynda jáne Jelezın aýdanynda sýbsıdııalanatyn jumys oryndaryna turǵan azamattar naqty jumys oryndaryna múlde barmaǵany aıqyndaldy. Eki qaladaǵy jumys berýshiler memleketke jalpy somasy bir mıllıon teńdegen astam zalal keltirgen.
«Qazannan qaqpaq ketse, ıtten uıat ketedi» demekshi, Ekibastuz qalasynyń bıligi ótken qysta qaladaǵy tótenshe jaǵdaı zardabymen kúresip júrgende jergilikti birqatar shendi ózderiniń aram nıetterin júzege asyryp jibergen. Shahardaǵy memlekettik mekemelerdiń ókilderi qonys aýdarýshylarǵa tıesili 15 páterdi ózgelerge taratyp bergen. Olardyń zańsyz áreketin jemqorlyqqa qarsy agenttik ókilderi áshkereledi. Baspana bólý jónindegi arnaıy komıssııanyń quramynda jumyspen qamtý jáne áleýmettik baǵdarlamalar bóliminiń mamandary ǵana bolǵan. Qoǵamdyq uıym ókilderin múlde kirgizbegen. Al páterlerdi bólý boıynsha sheshim qabyldaý kezinde zaldaǵy beınekamerany sóndirip qoıypty. Páter berilgen álgi adamdardyń memlekettik baǵdarlama jeńildigin paıdalanatyndaı esh quqyǵy bolmaǵan. Belgili bolǵandaı, bul páterler jumyspen qamtý ortalyǵynyń qyzmetkerlerine, týystaryna nemese tanystaryna berilgen.
Sybaılas jemqorlyqqa qarsy is-qımyl agenttiginiń ókilderi turǵyn úı bólý jónindegi otyrystardyń quramy men tártibin ózgertýdi, halyqty jumyspen qamtý ortalyǵymen birlesip, zańsyz berilgen páterler boıynsha kelisimsharttardy buzýdy usyndy. Tek osy bir zańsyzdyqtan memleketke 75 mln teńgeniń materıaldyq shyǵyny kelgen.
Pavlodar oblysy
